Charles Ndeumane
Ompangu yaamangestrata yaKatima Mulilo oya gandja egeelo lyoomvula 18 mondholongo komusamane nomwanamati sho ya monika ondjo moshipotha shedhipago lyaLemmy Mutonga ngoka a li nale omupeviwiliki muuministeli wiilonga niiyenditho.
Omunamimvo 69 Clemens Sibalatani nomwanamati gwomimvo 41 George Sibalatani oya pewa kehe gumwe oomvula 18 mondholongo moshipotha shedhipago lyaMutonga momumvo 2019. George okwa li a monika ondjo medhipago lyoshiningilawina momumvo 2019 sho a yaha nokudhipaga Mutonga ngaashi anuwa a lombwelwa kuhe.
Pethimbo oshipotha sha li mompangu, omupanguli Barry Mufana okwa ti aalundilwa inya ulika nande olukeno pethimbo taya pangulwa, inaya ulika euvonayi mwaashoka ya ninga. “Osha yela kutya eso lyaMutonga kali shi sha kuyo. Inashi puka kutya nakusa okwa dhipagwa edhipago lyakenahenda momukalo gwokwaa na ko nasha,” Mufana ta ti.
Ompangu natango oya pe Sibalatani nomwana kehe gumwe oomvula mbali dha gwedhwa po mondholongo moshipotha shokukala noondjembo niikuti kaashi li paveta.
Mutonga ngoka a li omukalimo gwomoWindhoek okwa li a yi koshitopolwa shaZambezi nelalakano lyokudhilula ohambo yiimuna ye opo e yi dhike pehala lyilwe molwomananathano ngoka ga li pokati kayo nofamili yaSibalatani pethimbo lyoshiningwanima.
Aakwanezimo yaMutonga yaali Calyson Sibalatani (32) oshowo Patrick Sibalatani nayo oya pewa egeelo lyoomvula mbali mondholongo kehe gumwe sho anuwa ya li ya ponokele Mutonga nelalakano lyoku mu monitha oshiponga kolutu.