Charles Ndeumane 

Ngoloneya gwoshitopolwa shaMusati Erginus Endjala okwa holola kutya elelo lyoshitopolwa shoka olya kateke ompangela yaNamwater yokutula omunino gwomeya mokanaala komeya hoka ka za koAngola momumvo.

Endjala okwa ti momumvo 2016 NamWater okwa li a yi kombelewa yelelo lyoshitopolwa shaMusati opo ya kundathane ompangela yaNamWater yokupata okanaala hoka haka eta omeya moshilongo okuza komulonga gwaKunene koAngola nomunino gwomeya ashike ombelewa ye inayi pitika ompangela ndjoka yi ye komeho oshoka okanaala hoka oke li oshitopolwa sha simana shopamahupilo kaakalimo oyendji moshitopolwa moka. 

“Pethimbo okanaala hoka ka li ka tungwa po okuza momumvo 1962 sigo 1966 aantu ayehe mboka ya li ya tungila mpoka pwa enda okanala oya inyengitha omagumbo nomapya gawo noyamwe oya tembuka po thilu. Aantu mboka Kaya li ya futwa iimaliwa sho omapya nomagumbo gawo ga inyengithwa, oya adha euvathanotsokumwe kutya ofuto yawo okulongitha omeya gokanala hoka oshali. Ngashingeyi ngele Namwater okwa pata okanaala aantu mboka otaye ka futu ngaa?” 

Sho onzo ndjika ya ningi ekwatathano nomupopiliko gwaNamWater Lot Ndamanomhata opo a yelithe ngele natango NamWater oku na tuu ompangela yokutula omunino mokanala hoka okwa ti ke na uuyelele moshinima shoka. 

Endjala okwa ti okanaala oke li oshitopolwa sha simana unene shopamahupilo kaakalimo oyendji yomoshitopolwa shaMusati. Aantu oyendji moshitopolwa moka ohaya hupu muunafaalama wiimeno moka haya mono iikulya oshowo iiyemo. Okupata okanaala otashi ningi omahupilo omadhigu kaantu oyendji oshoka ondando yomeya oyi li pombanda.

-mrndeumaneraycharles@gmail.com