WINDHOEK – Omupehanashipundi gOlaata yOpashigwana (National Council), Margraret Mensah Williams okwe shi holola puuyelele mEtiyali sho a ti iipangelo oyindji yepangelo moshilongo oya taalelwa kompumbwe onene yomiti oshowo iikwathithi yilwe yoapoteka. Ehololo ndika koshilyo shoparliamende otali pataneke eyamukulo lya ningilwe kOminista yUuministeli wUundjolowele nIilonga yOnkalonawa omathimbo ga zi ko, okwiipatana omahokololo giikundaneki kutya iipangelo yepangelo oya taalelwa konkalo ya dhiginina yompumwe yomiti oshowo iiyakulitho yilwe ya simana. Mensah-Williams okwa li a yambidhidha omapopyo ge megumbo ndika lyokutalulula ooveta noompango moshilongo mEtiyali nombapila ndjoka kwa li ya nyolelwa Aanambelewa Aakuluntu yUundjolowele, ndjoka tayi ya tseyithile shi nasha nonkalo yompumbwe yomiti moaputeka yontumba moshitopolwa.
Mensah-Williams okwa li wo a pitike aatoolinkundana ya tale oshitopolwa shimwe shombapila ndjoka. “Tse otwa kambadhala mpoka tatu vulu okuhehela komahala galwe ngoka tashi vulika ge na iipumbiwa yimwe mbika yopaunamiti, notwe shi pondola okumona po yimwe mbyoka ya kala po awike uule woshiwike shimwe. Shi nasha nomusholondondo nguka otamu monika lela yimwe yomiipumbiwa yimwe mbyoka ya simana noonkondo. Omupya omunene, iikaha yetu oya ngambekwa pamuthika goaputeka,” osho oshitopolwa shimwe shomukanda nenge ombapila ndjoka tayi ti.
Mensah-Williams ota ti okwa li a pulwa kaakwashigwana yontumba mboka ye na olune opo a popye oshinima shika molaata yopashigwana – nenge moparliamende opo epangelo li shi kuthe ko ongoshinima shomeendelelo. Okwa li a pula nokwiindila Uuministeli wUundjolowele nIilonga yOnkalonawa wu katuke onkatu yomeendelelo shi nasha noshikumungu shika, opo ku gamenwe oomwenyo dhaakwashigwana/aavu/aayakulwa, nokwe shi popi kutya okwa tseyithilwa kutya oshikumungu shompumbwe yomiti kashi nasha andola nompumbwe yiimaliwa nenge kutya kape na iimaliwa okulanda omiti oshowo iiyakulitho yilwe ya pumbiwa miipangelo yepangelo, ndele oshi nasha ashike nomukalo ngoka Ompungulilo yOmiti (Central Medical Store) tayi wilikwa. “Aantu oye na okugandja po iinakugwanithwa – iimpwiyu yilwe, shika oshi li ngeyi oshoka oshinakugwanithwa shika (ano shokupungula omiti ) oshi li awike mOvenduka, iinima ayihe otayi ningwa ashike mOvenduka omanga aantu kiitopolwa taya mono iihuna,” osho ta ti. Mensah-Williams okwa tindi okuholola omauyelele agehe – nenge iikalimo ayihe yombapila, ta ti okwa hala okugamena oonzo dhe dhoka dhe mu yakele ko. Ombapila okwa li ya shangwa konima sho oshipangelo shimwe moshitopolwa kwa li sha pula nokwiindila omiti oshowo iipumbiwa yilwe yopaunamiti, ngaashi oongwiya dhoowenda, uumbi, uushako womasita, oshowo –oxygen masks, mokati kayilwe.
Ombapila otayi ti kutya oyindji yomiinima mbyoka oya kala kayi mo mositoka mOmpungulilo yOpaunamiti ndjoka onene okuza nokuli petameko lyomvula ndjika. “Ngame itandi popi nenge tumbula iinima mbika molwaashoka andola nda hala okupopya nayi – okunyana omuntu gwontumba, ihe shika otandi shi ningi ashike molwuuwanawa waakwashigwana,” osho ta ti, nokutseyithila aatoolinkundana pondje yomatungo golaata yopashigwana, nokutumbula kutya okwa li a hala nokuli okuya a ka mone Omupresidende oshiwike shika shi nasha noshinima shika, ihe ine shi ninga oshoka Omupresidende Hifikepunye Pohamba oku li pethimbo ndika koNew York hoka e li kOmutumba omuti-68 gwAayehe gwIigwanahangano.