OKANDJENGEDI- Oshilyo shomutumba gwopashigwana Mondestus Amutse okwa ti, elelo lyondoolopa lyOshakati lya gwanitha po noku tula miilonga omalalakano gongundu Swapo, nuunene olya kwashilipaleke kutya omuNamibia kehe okwa mona olukalwa luli hwepo.
Amutse dhoka okwedhi popi Olyomakaya sho kwali kwa ningwa oshigongi soSwapo sha ningilwa kOkandjegedi, mOshakati.
Okwa fatulula kutya oshigongi shoka osha nuninwa okulongekindha oshigwana pamandilandhilo opo shika hogolole mondjila, sho tashi ka hogolola ongundu tayi pangele Swapo, momahogololo gookansela yiitopolwa oshowo yomalelo goondolopa muNovomba.
“Sho tatu popi ngashiingeyi, elelo lyondoolopa lyOshakati olya longekidha omahala gaakalimo yomOshakati, mboka taye kega pewa oshali sha mu hongi opamwe nomayakulo agehe,” ta popi ngaaka.
Amutse okwa fatulula kutya kehe gumwe eli mombashu momalukanda mOshakati otaka mona ehala lye mwene lyaandjuka nawa lyo lyina omayakulo agehe taga pumbiwa, nomalongekindho ngoka ogeli metifa nale.
Ta yelitha kutya ayihe mbyoka oya yi miilonga omolwa omutse gwoshilongo Netumbo Nandi-Ndaitwah a gandja omalombwelo nomatokolo ngoka gaye miilonga mbala.
“Omauwanawa ngaka itaga ningwa ashike mOshakati, ihe omoondoolopa adhihe moNamibia, ihe shoka otashi holoka ashike uuna aanamibia taya hogololo ongundu Swapo, yo yi vule okueta omauwanawa ngoka,” ta popi ngaaka. Amutse okwa kumagidha oshigwana kutya momasiku 26 gaNovomba, oshigwana nashi ka hogolole mondjila, nashi hogolole ongundu ndyoka yina noshigwana moshili, opo shi tsikile okumona omauwanawa agehe ya hala.
Okwa ndhimbulukitha wo oshigwana kutya, okwa pitithwa noku kolekwa kutya , omumvo taguya itaku ka futwa iiputundhilo yopombanda mbyoka ya kala uupyakandhi unene kaakuluntu yamwe okufutila aanona yawo yaka tsikile omayilongo gawo.
Omunashipundi melelo lyondoolopa lyOshakati Hofni Mutota okwa ti, okwa tothwa mo omahangano geli 11 taga longo iilonga ya yooloka, okupitila momilandu dhoku gandja iilonga. “Aanilonga ,mboka oya tameka nale, no twa tengeneka iilonga mbyoka tayi kala yapwa omumvo taguya kehuulilo lyaFebruali,” ta ti ngaaka.
Oshinyangadhalwa shika osha tameke momasiku 26 gaSeptemba nuumvo.
Omukuluntu melelo lyondoolopa Timoteus Namwandi okwa ti oya kala nokuninga iigongi okugandja uuyelele kombinga yetompelo lyokutendulula Oneshila.
“Uuyelele mboka wali wa gongelwa owali wa tumwa koombelewa dhoSurvey General hoka kwazi ezimino opo aakalimo ya mone uumwene wevi womahala ye li mo paife,” ta fatulula ngaaka.
Namwandi okwa kumagindha wo oshigwana shi longele kumwe naanambelewa mboka taya kathika pomagumbo gawo.
Elelo lyondoolopa lyOshakati nando lya kala nokutembundhila omalukanda kehala limwe kOnawa, olya ti omalukanda ge li gatano itaga ka tembudhwa.
Omalukanda ngoka itaaga tembudhwa ongaashi Oneshila, Okandjengedi, Evululuko, Ompumbu osho wo ombinga yimwe yUupindi.
Omahala ngoka otaga ka tulwa ashike pomuthika gwondoolopa.