Katima Mulilo – Ina yoimhutu itatu, Sinyama Lutombi, omukalimo womoChotto moshitukulwa shaZambezi, ota pula eyambidido lounamiti oshoyo loikulya moshiwana omolwokamonamati komido nhee oko ke na omukifi wondjala.
Lutombi okwa popya kutya okamonamati Chombo Muniswaswa, oka kala okanghundi efimbo, nounghundi oo owa imba ka kule ke li nawa ngaashi ounona vakwao.
“Natango oha monika ashike munini a fa okaana kashona ashike okwa kula,” Lutombi ta ti.
Lutombi okwa popya kutya nonande a kala nokunyamifa Muniswaswa fiyo ta wanifa odula, natango oudu waye inau tya po xwepo.
Muniswaswa okwa dalwa mo2019 ndele opo ashike a tameke okweenda odula ei.
Pefimbo Muniswaswa a dalwa, ndokotola vati okwa lombwela ina yokaana kutya oke na omanyutu. Lutombi okwa tumbula yoo kutya okaana oka dalwa ke na natango oupyakadi wokuvela medimo, noha ka kala taka vele koo taka lili efimbo alishe ngee ta ka i kondje.
“Eshi ohashi endifa omwenyo wange alushe,” Lutombi ta ti.
Lutomboni okwa hokolola kutya yee iha longo, noha xupu noudjuu okumona oikulya yokaana kaye shaashi ohaka li ashike oikulya yoikunguluki. Ota pula yoo ekwafo moshiwana opo shi dule oku mu yambidida apa tashi dulu, opo shi mu pe oikulya ya nika oikunguluki yokaana kaye.
Lutombi okwa popya kutya okwa shangifa okaana kaye oimaliwa youkwanaluhepo yokomwedi yoN$250, ashike nande ongaho inai wana shaashi aishe ohai tulwa ashike moshipangelo.
“Ame mwene ngee handi popi nokaaana kange ondi wete kutya ohaka kala ke udite ko lela eshi nda hala okupopya, onghee kandi wete shili taka vele omanyutu.
Ohandi pula yoo natango oshiwana shi vatele nge opo ndi dule okumona ondokolotola yopombada, ku dulike okumonika kutya okaana kange oke na oupyakadi washike.” Lutombi ta weda po.
“Ohandi pula lela oshiwana shi vatele nge opo ndi dule okupa okaana kange onghalamwenyo i li xwepo. Keshe nee ou ta ka kwafa nge mokuyambidida okaana kange na denge konomola 0814193135.” Lutombi ta ti.