Auleria Wakudumo
Oshiponga shotuwa ya li ya humbata ovadanitanga okuya konhanda youdano wetanga lokeemhadi osha twaalela omwenyo womudani umwe omanga vahamano ve li moshipangelo.
Oshiningwanima eshi osha ningwa Olomakaya lwopo 10h00 lwaapo, kopate yomamanya, eekilometa 62 okuya moHenties Bay. Nakufya okwa tongololwa oye Romario Narib weedula 19.
Oshiningwanima eshi osha kolekwa komupopiliko wopolifi, Deputy Commissioner Kauna Shikwambi.
Otaku hokololwa otuwa yoToyota Landcruiser ya li i na ovadani ve li o18, mwa kwatelwa omushingi.
Ovadani ova li tava di koUsakos va uka koHenties Bay koudano wetango lokeemhadi.
Otaku hokololwa omushingi a dopa okukanghameka otuwa sha dja eshi elola lotuwa limwe la topa ndele otuwa tai alangata.
Narib okwa xulifila moshipangelo shaHenties Bay omanga vakwao vahamano va mona oshiponga va tuminwa koshipangelo shepangelo shaSwakopmund va mone epango lopaunamiti la wedwa po.
Oshiningwanima shikwao, omulumenhu weedula 44 osho yo umwe ina tongololwa natango ova xulifa moshiponga shotuwa.
Eshi osha ningwa Olomakaya lwopo 20h30 lwaapo okuya moRehoboth.
Nakufya okwa tongololwa oye Jakobus Uirab omanga mukwao ina tongololwa natango.
Otaku hokololwa otuwa yo-BMW oyo ya li tai di koRehoboth ye lidenga mumwe noToyota Seven seater oyo ya hangwa ya uka koRehoboth ndele tai twaalele eemwenyo davavali ovo va li ovatwaalelwa mokaSeven seater.
Opolifi oya holola yo kutya ovatwaalelwa vatano ova mona oshiponga. Vamwe ova tambulilwa moshipangelo shepangelo moRehoboth, vamwe ova tambulilwa moWindhoek.