OUTAPI – Omufita Elikana David weedula 33 ou ta tamanekelwa ekwatonghonga lovanafikola vatatu, okwa anyenwa omhito yokulifutila mo modolongo konima eshi a holoka momhangu yaUtapi onghela.
Oshibofa shaye osha undulilwa komafiku 12 June 2024 opo ku ningwe omakonakono omoule.
Davind ota pangulilwa oibofa itatu yekwatonghonga noibofa ivali yekwatepo ombambyona .
Omufita ou vati okwa kwata onghonga oukadona vatatu ovanafikola keumbo laye.
Otaku hokololwa oonakuninga oihakanwa ove li oilyo yongeleka yomufita ou.
Ongeleka ei oi li momukunda Okandi moshikandjohoololo shaEtayi moshitukulwa shaMusati.
Omukulunhu koshikondo shokukonakona oimbuluma wopolifi mOmusati omupedu Commissioner Moses Simaho okwa hokolola ta ti ovanafikola ova kwatwa onghonga momafiku a yooloka.
Otaku hokololwa kutya David okwa li a ufana ovanafikola ava opo va ka wapaleke onduda yaye yokunangala nokudja opo vati okwa ya navo moixulo.
Oonakuninga oihakanwa umwe oku na omido 17, umwe oku na omido 19 omanga umwe e na omido 24.
Otaku hokololwa kutya aveshe ova kwatwa onghonga omwedi wa dja ko momafiku ngaashi 17 Febuluali, 6 Febuluali noshoyo 24 Febuluali.
Pefimbo Kundana a talela po ongeleka, mefiku tuu olo omufita a kwatwa po omukulukadi womufita okwa hokolola ta ti omushamane waye ota lundilwa shaashi vati kamu na ouyelele woshili mehokololo omu.
“Ounona ove hole okuya keumbo letu efimbo loufiku tava pula ekwafo leepena, ile oshimaliwa. Efiku limwe omunafikola umwe okwe ya keumbo letu Iwopotundi 23h00 ta pula ekwafo lopena yokushanga kofikola nokudja opo omushamane wange okwe mu pa opena ndele ta shuna keumbo,” ta hokolola.
Onghee okwati ina didilika omushamane waye e li mekwatafano noilyo yongeleka yaye. Omukainhu ou okwa ti okwa kumwa eshi taku tiwa omulumenhu waye okwa kwata ovanafikola onghonga molwaashi alushe oha kala nomulumenhu waye meumbo. -fhamalwa@nepc.com.na