Ounona vofikola ve li vane ove lihanga ve li momateelelo eshi vati va mitikwa komufita wongeleka yoshiveva i li momukunda Omunyekadi moshitukulwa shaHangwena.
Ounona aveshe ava ovanafikola pofikola Etomba Combined School.
Edi oda etwa pouyelele kelenga lakula loshikandjo Eudaneko, tatekulu George Nelulu efimbo ohamba yaUkwanyama ya talela po oshikandjo shaye mexuliloshivike.
Nelulu okwa ti ova lulilwa keengeleka doshiveva di li moshikandjo shaye tadi pukifa oshiwana mwa kwatelwa ounona vofikola.
“Ovanafikola ohava kala alushe ve li keengeleka doiveva nopefimbo leetundi omanga vamwe ohava faula keetundi molwaashi va patelwa meengeleka kovafita,” Nelulu ta ti.
Nelulu okwa pula ohamba yaUkwanyama meekulu Martha Mwadinomho Kristian Nelumbu opo i kale ya kandula po omukundu ou moshitunda shaUkwanyama.
“Ovanhu pomaushiinda kave na vali ombili omanga eefamili dimwe oda topolwa keengelaka konima eshi da lombwelwa kutya otava liwa kovakwapata vavo,” ta ti.
Omapekaapeko a ningwa kuKundana okwa twala fiyo opukamwe komoukadona ovo tava popiwa va mitikwa komufita.
Omunamido 19 ou edina laye itali hololwa vati okwa mitikwa po komufita Fransa Ndatitangi wongeleka i li komukunda Okahonde.
Okakadona oko, aveshe naNdatitangi ova koleka eteelelo olo, ashike ova ti kaka li mofikola pefimbo ka pewa eteelelo.
“Mofikola onda hangika nda dja mo nale eshi twa shakena naNdatitangi mongeleka,” ta ti.
Ndatitangi okwa ti ye ina puka eshi a mitika okakadona oko, ina hanga haka i kofikola.
“Ovanhu ove li omhinge neengeleka detu doiveva. Inashi puka ngeenge omufita a mitika okakadona ka dja mongeleka yoshiveva,” ta ti.
Okwa hokololwa ovanafikola ve na omateelelo hava fikola kofikola Etomba Combined School tava ka ningilwa omapulapulo ngeenge va tameke ofikola opo va popye kutya ova omatikwa kulye.
Toivo Nghitotelwa wongeleka yoshiveva yoJoy of Harvest Salvation Ministry, umwe wongeleka ei tai fekelwa kutya omu na ovanafikola va ninga omateelelo okwa ti ongeleka yaye otai lundilwa.
Nghitotelwa okwa yelifa ta ti mongeleka yaye omu na oukadona vane va ninga omateelelo ashike ye haye e va matika.
“Oukadona vavali ova mitikwa kovakeleli vomaliko, okakadona kamwe oka mitikwa komulumenhu a li oshilyo shongeleka yange ashike paife naye okwa ninga ongeleka yaye i li komukunda Okahonde. Okakadona okatine kandi shi kutya oka mitikwa kulyelye,” Nghitotelwa ta ti.
Nghitotelwa okwa ti ongeleka yaye itai pukifa oshiwana molwaashi fiyo opapa ina mona omunhu e na ohombo ya teka ile omunafikola a kufwa mofikola kongeleka yaye.
“Ngeenge ope na munhu a pukifwa koilonga yange ile omunafikola kwa li handi mu pula tuye naye moixulo ne uye pouyelele,” ta ti.
Omufita mukwao naye wongeleka yoshiveva, wongeleka i li momudingonoko waNdobe, oo a pula opo edina laye liha popiwe, okwa holola kutya naye okwa uda omahokololo e na sha nomufita mukwao e li momudinongo wavo ha i moixulo novanafikola.
“Naame ohandi udu omanyenyeto koshiwana kombinga yambushe moilonga ta pukifa oshiwana nongeleka yaye,” ta ti.
Kundana ka li ta dulu okukoleka omuvalu wounona oo wa popiwa kelenga Nelulu, ashike omuhongifikola umwe pEtomba Combined School, okwa ti pofikola yavo neudo ope na ounona voukadona ve li vaheyali ve na omateelelo, ashike ke na ouyelele kutya ova mitikwa koolyelye.
“Naame onde shi uda ashike tashi popiwa momukunda wetu kutya ope na omufita woshiveva ha i moxiulo nounona vofikola,” omuhongi ta ti.
fhamalwa@nepc.com.na