Omufita wongeleka yedina Believer Christian Church, Shalongo Haimbodi vati okwa ningila omatilifo omukulunhu wehangeno loMonica Gender Equality Human Right & Social Justice ta ti ota dipawa ‘kuwalye’ shaashi e mu twala komhangu.
Nashilongo, okupitila mehangano ha kondjifa oimbuluma nomahepeko oukashikekookanhu, vati okwa yambidida ile a twa omukumo ovakainhu ovo vati tava hokolola kutya ounhu wavo owa shundulwa kuHaimbodi vati e va ula kutya voo ovalodi.
Meenghundafana davo naKundana Nashilongo okwa hokolola ta ti konima yoivike ivali ombelewa yaye oya lopotelwa kombinga yovakainhu vavali va pambafana ve mu lombwela kutya eumbo lavo otali tewa po kongeleka yaHaimbodi oo a lombwela umwe womovakwaneongalo laye, Asteria Alweendo otave mu li ovanhu. Mokavidio oko ka longifwa momhangu opo Haimbodi naAlweendo va handukilwe nokufutifwa oN$15 000 molwomalundilo, Shalongo vati okwa ti Aloisa Shingundi Nehoya naVeronika Venokatiti Ngitwikwa otava litongomona okupitila muAlweendo, tava popi kutya otave mu li.
“Okudja opo onda kwatafana naHaimbodi opo a xulife po oshinima eshi ta ningi molwaashi osha puka nota teya po omaumbo ovanhu. Ashike Haimbodi okwa kala nokutwikila okulombwela ovakainhu oinima ya nyika oulodi,” Nashilongo ta ti.
Okwa ti okudja opo ovakainhu ova ya komhangu oko Haimbodi a handukilwa opo a fute.
“Inandi manguluka vali ngeenge handi ende mokati koshiwana shaashi onda tila okudipawa nondjebo,” ta ti.
Nashilongo okwa ti Haimbodi okwa ninga okavidio komalungula ta popi ta ti kutya yee okwa mona omadeulo okulwa omalwoodi oita.
“Ondi na eendjebo dihapu di na omikanda. Nashilongo neehaende daye ondi na okuvadipaa nondjebo molwaashi otava kakeke edina longeleka yange, vo ova hala okupatifa ongeleka yange,” Haimbodi ta popi mokavidio e li mongeleka yaye komesho yovakwaneongalo.
Lopokati opo, Haimbodi okwe likala ta ti haye ta popi mokavidio.
“Okavidio oka tulwa ewi lange handi popi ashike ame mwene ndi li mo. Onghee ina ndi popya oitya i li ngaho,” Haimbodi ta ti.
Okwa weda po ta ti okwa popya ashike ta ti ngeenge okwa kwatifwa po okuya modolongo ota dipaa ovanhu neendjebo ovo ve mu kwatifa po konima ngeenge a dimo modolongo ashike ina popya edina laNashilongo.
Haimbodi okwa ti okwa udifwa nai kuNashilongo eshi ta kakeke edina longeleka yaye kutya otai pukifa oshiwana.