Ombara Kaina Ousemba wo Kukonda Ongwa I Kae Matundu-Tjiparuro OTJOMUISE – Omupangure Collins Parker watja ondiero yOuhonapare wOmbazu wOmbanderu nOmbara Munjuku II Nguvauva okukonda ongwa yo ma memeno wongunde veta yombazu yOmbanderu kaina ouwa, o u rizemburuka ouwa nu ondombakanise yongaro ombwa. Ondiero indji kaina ondikameno nu munao otjiya yarukirwa na ina kaurwa. “Munao kangamwa atjihe tjitja ungurwa poo tjimakuzu tja ungurwa kehi yoveta indji ya 1 ku Seninarindi mo 2005 katjipo. Munao ovaningire avehe mave kawondja komurungu movito vyao kehi yongunde veta noveta yombazu,” Parker watjere Oritjatano tja yandjere oumune we motjiposa tjongundeveta yOmbanderu mOtjombanguriro tjo Kombanda mOtjomuise. Parker watjere mo Namibia kangamwa orutu orunane rondiero kaani ndji maiyenene okutuna komausemba, ozondero nawina omaundjiro wa katjotjiri womundu rwasere okuungura oukohoke. Munao kangamwa ondiero poo omukambo mbumautunu komundu mo mwano kangamwa wasere okurira omukohoke. Wina orutu indui poo omundu ingwi wasere okupandera pomazeva wongaro youndu. Watjere okuza nokutara kozoveta nomazeva peke peke tja ungura owatjiri orondu tjatoora oumune umwe uriri mbumautja omuzire omutenga noutjavari moku konda ongwa yo maunguriro wongunde veta vatomba ezeva rongaro yomaunguriro omakohoke yokuyandjera omunda imbo warwe okuraisa oumune wawo. Wina veritjinda nokuhina o u rizemburuka ouwa nu nokuhina ouwa. Mokutja ombara mo ku konda ongwa aa ungura otjiungura tje kehi yoveta indji yo 2000, Parker watjere kahepero okuraisa kutja mehi rouyara tjimuna o Namibia mo ku zemburuka e Artikeri o 18 mapeso okutjiukwa kutja motjiungura tje kehi yOveta yo 2000, Ombara Munjuku II uundjirwa okunana moukohoke, no u rizemburuka ouwa na pandere poveta yomaunguriro woundu mena rokutja oveta yombazu yasere okuhorera kOngundeveta yehi. Komarambero wozorata movito vyao Parker watjere mokutara mo marambero inga pasere oku purwa kutja hapo omurambe nguri Ombara yOvambanderu watjita nao kehi yomazeva we artikeri 18 rOngunde veta ya Namibia poo indee? Watjere kapena ombata mo tutu kutja Ovaningire mberi ozorata nda isakewa kovihavero vazikwa movihavero imbi na ve tjiukisiwa nao morutuu ro kotjiveta rwo horomende otjo zorata zo mbazu zOuhonapare wOmbanderu otja koveta yOmauhonapare wOmbazu yo 1975 otja tji yarundururwa mo 2000. Ohoromende yOmondivitivi ivepa okamariva mena rovito vyao mOuhonapare wOmbazu wOmbanderu. Otjo mukuramenpo wo horomende kehi ye artikeri 18 Ouhonapare wOmbazu wOmbanderu aa uundjirwa okutenga omazeva wongaro ombwa, tjinene nene ezeva indi nditja omunda imbo warwe wasere okuyandjerwa okuriyapura. Parker watjere otjombanguriro katjina kuundjira omauhonapare wombazu novanane vombazu tjimuna Ouhonapare wOmbazu wOmbanderu nOmbara Munjuku II okutjinda oviposa vyo kupeta poo okuronga ounepo wavyo tjimuna ovyombanguriro posyo ma tji undjire ko okupandera pomazeva nandarire outiti okuurisa omazeva wongaro ombwa kehi ye artikeri o 18 rOngundeveta ya Namibia. Munao omauhonapare wombazu novanane vombazu otji vasere okunana omirari mbi maviyandjere omundu ngumarongwa kutja mayenene okuriyapura nawa no kuyandja ouhatoi we poo munda imbo we motjiposa no kutja mayene okuvingurura kangamwa omakuminino poo omaindjambo ngahu ngamisiwa ye. Omauhonapare inga yasere okupuratena nawa no u kohoke kominda aviyevari na u pandere pomazeva wo u kohoke no kuungura otjiungura tjavyo nokuhina etiku nongarera nu no u rizemburuka ouwa mombepo ongohoke. Avihe imbi kapena tjimwe Ouhonapare wOmbazu wOmbanderu poo Ombara Munjuku II watjita komurungu wokuramba ovaningire nu munao otjeri ouhakohoke, okuhina ourizemburuka ouwa nu mu avihe omatombero wongaro ongohoke. “Munao otji me i taverasana nOmutengwa Corbett kutja omuzire omutenga noutjavari vatomba e Artikeri 18 rOngundeveta ya Namibia. Mokutara mu imbi avihe okuyandjera ondiero indji kutja ikurame marire okupenga Ongundeveta. Munao ondiero yo muzire omutenga (Ouhonapare wOmbazu wOmbanderu) noutjavari (Ombara Munjuku II) okuramba omuningire omutenga (Erastus Kahuure) otjo Rata yOmbazu Onene no vaningire varwe otjozorata zombazu zomuzire omutenga otja koveta yo 2000, otji yayarukirwa na inakaurwa.” Parker watjere Ouhonapare wOmbanderu wOmbazu nOmbara Munjuku II kutja pamwe poo peke peke vasere okusuta otjimariva tjovaningire tjOmahaameno omatenga wotjombanguriro tjiyari 8 ku Kambundu ombura ndjazuko. Omayuva ingo otjombanguriro otji tja yandja oumune wo pokati koruveze. Wina vasere okusuta otjimariva tjo mahaameno inga omaseinina ngari okutara mondimwa yomaningiriro wovaningire. Po mbongarero yo zombuze kombunda youmune womupangure Parker, ovanamutjemo va yauzire oruvaro nongamburiro yao mOmbara Munjuku II navetja mave kawondja komurunu okukara norupa orupyuke motjiungura tjOuhonapare wOmbazu wOmbanderu okutiza ombazu, ovinenge vyombazu nongaro novitjitua vyo muhoko mondero yo zo ndekurona za ndinondi na muhuka. Wina ovo vatjere mave roporora eke rao ro maunguriro kumwe nomuhoko nokuhina otjavivi. Posyo omaunguriro wa kumwe inga yasere oku hongorerwa po iyo omeriyandjero kaani na wina ombongarero yo hanganeno. Vatjere ohepero ominda aviyevari okuzuvasana kutja nambano okuzamba ondjira komurungu ma i sana pi. “Otjiungura komurungu okuza ku ndinondi tjiyeri 13 ku Kozonjanga tjasere okurira otjo muhoko auhe. Ovazire kehi yOmbara Munjuku II mo u nyanutima wao vasere oku puratena korutuu rovinenge nozondjemeno zo vaningire. Omukambo imbwi ma u ke ondjira yo maunguriro wa kumwe no ndjesirasaneno mo muhoko wOvambanderu.”