Auleria Wakudumo 

Ouministeli wehongo, eenghulunghedi, omaungoba, ovanyasha nomaudano owa holola kutya itau popile omakwatafano opaihole oo taku hokololwa a holoka vati pokati komuhongifikola novahongwa vovamati pofikola yaGrootfontein. 

Oshiningwanima eshi osha ningilwa pofikola yedina Wilhelm Nortier Primary moGrootfontein, sha ningwa momafiku 14 Novemba neudo, oufiku pefimbo olusheno la wa ko. 

Omufekelwa vati okwa pula umwe womovahongwa opo e mu danene koukulunhu waye oo a faduka po nokuhondama koshi yombete. Ovahongwa vakwao vati navo ova koleka kutya ova kala hava fininikwa okuya mekwatafano lopaihole nomuhongifikola ou. 

Omukulunhuwiliki mouministeli wehongo Mbumba Haitengela okwa holola kutya ouministeli itau popile oshinima sha tya ngaha notau ka longela kumwe nopolifi opo u kwashilipaleke kutya omufekelwa okwa ningilwa omakonaakono aeshe a pumbiwa noshili tai uya poluhaela. 

Haitengela okwa koleka kutya omufekelwa okwa tulwa nale moipandeko noku li natango konima yekumba. 

“Omakonaakono opolifi otaa twikile natango okuningilwa ovahongwa pofikola opo,” Haitengela ta holola ngaho. 

Omukulunhuwiliki okwa holola yo kutya nonande omufekelwa a tulwa moipandeko, vati okwa hangwa a tula mo eindilo lokulikufa moilonga nale. 

Ouministeli otau shivifile oshiwana kutya oshibofa eshi oshi li paife momake omhangu nosha kwatelwa komesho koveta. Ouministeli otau udanekele yo ovadali noshiwana ashishe shaNamibia kutya oshibofa eshi otashi ningilwa omapekapeko omoule nopolifi oye litula mo moilonga yayo. 

“Ouminsteli otau longele kumwe nopolifi opo tu kwashilipaleke kutya oonakuningwa oihakanwa aveshe ova mona omakwafo a wedwa po ngaashi okumona ekwafo kovaxungimwenyo,” omukulunhuwiliki ta holola ngaho. 

Haitengela okwa denga omufindo kutya ouministeli ihau popile ehepeko lovahongwa, tali ningwa momukalo wonhumba. Okwa ti ehepeko lasha tali ningilwa ovahongwa olili omhinge nomilandu douministeli wehongo. 

-wakudumoauleria@gmail.com