Omukainhu weedula 50, omuhongiofikola keifano okwe lifutila mo mo d o l o n g o noshimaliwa shoN$2 000, ta tamanekwa eshi vati a xwika po eumbo lomukulupe weedula 88.
Oshiningwanima eshi osha ningilwa momukunda Oshatotwa moshitukulwa shaHangwena momafiku 08 Januali neudo.
Otaku hokololwa Carolina Amutse a xwika po eumbo lomukulupe Olivia Ndilula noku mu ningila omatilifo kutya ote mu denge konima yeenhamanana dokukondjela edu pokati kavo.
Omukonakoni woimbuluma moshitukulwa shaHangwena Chief Inspector Victor Haludilu okwa hokolola ta ti omufekelwa okwa kala nokutataa Ndilula opo a dje mo mepya omo a dika eumbo.
Va ti Ndilula mepya omo okwa ninga mo eedula 30, kwa li a pewa mo onhele kukahewa kaye ou e li ina yomufekelwa.
Opolifi oya hokolola tai ti omufekelwa okwe uya meumbo lomukulupe efimbo loufiku te mu lombwele kutya na dje mo mepya laina nongeenge ina hala okudja mo ote mu longele oushada.
“Mongula eshi kwa sha efimbo longula omufekelwa okwa ya meumbo laNdilula ndele ta tameka okuxwika po eenduda nhano,” Haludilu ta hokolola.
Okwa weda po ta ti ovashiinda ava ova tameka okutanguna shaashi va ti omutekulu waNdilula umwe ta tete po omuti u li mekove lavo hau kala mu na eyoka onghee okudja opo vati omufekelwa pamwe navamwainamati ova tameka va handuka eshi omuti wa tetwa po.
Onghee okudja opo ova tameka tava tataa Ndilula kutya otadi mo mepya lavo shaashi omutekulu waye a teta po omuti.
Nakuninga oshihakanwa Ndilula eshi a ninga eenghundafana naKundana okwa hokolola ta ti okwa fiwa pomutenya shaashi omaliko ayeshe a pila meenduda da xwikwa po, mwakwatelwa oshimaliwa shoN$850-00.
“Kandi na sha vali oikutu, oikulya nonduda yokunangala. Onghee paife ohatu nangala ashike motenda twe i pewa komukwashiwana,” Ndilula ta hokolola.
Ndilula okwa yelifa ta ti ponhele opo pe na eumbo laye oi li kedina laye mwene, ye oha futu noifendela yeumbo nonande kwa li a pewa po kukahewa kaye a ninge po eumbo laye. “Paife ohandi uka peni ngeenge ponhele apa onda ninga po eedula 30. Ohandi ningilwa alushe omatilifo kutya ohandi di po ponhele apa,” ta hokolola.
Ndilula ota ndile moshiwana opo shi mu yambidide noikulya, oidjalomwa nosho tuu oikwafifo ya yooloka. Okwa ti ou e na ehalo lokuyambidida na kwatafane nombelewa yakansela wavo Erickson Ndawanifa. Omushipundi welelo laUkwanyama Eliaser Waandja okwa ti ombelewa yaye otai ka ninga omakonakono kombinga yoshikumungu eshi.
fhamalwa@nepc.com.na