Omukainhu weedula 43 okwa dipaa nokufudika ohanana konima yokupulumuna.

Oshiningwanima eshi osha ningwa omwedi wa dja ko ashike omukainhu opo a kwatwa po onghela inya. 

Onghundana oya kolekwa komupopiliko wopolifi moshitukulwa shaShana, Inspekta Frieda Shikole. Shikole okwa ti omufekelwa okwa pulumuna okaana kokamati, monduda omo ha di namukwao umwe nokaana kaye. Vati konima yokupulumuna okwa ponda ohanana noku i dipaa pefimbo olo. Oshiningwanima osha ningwa petameko laJuni 2024 momukunda Omatando mOngwediva. 

Omufekelwa okwa tonyena okaana mondjato nokufudika olutu lako momudingililo weumbo. Oinima aishe ei vati oya ningwa momesho omukainhu oo hava di naye a nangala mondunda imwe.   Efiku la shikula, nakudipaa ohanana okwa tameka ta ningile ombangi omatilifo, vati ta ti ote mu tulile oudiyo moikulya yaye nokaana kaye ndele teva dipaa ngeenge okwa popi eshi sha ningwa po. 

Momafiku 26 Aguste 2024, ombangi oye litwa omukumo nokulopota oshiningwanima kopolifi. Eshi okwe shi ninga a loloka omatilifo ha ningilwa komufekelwa. Olutu lohanana olo la hangwa la ninga nai ola fudulwa mo, nomukainhu okwa kwatwa opo. 

-wakudumoauleria@gmail.com