Omukainhu weedula 40 okwa kengelelwa oshimaliwa N$30 500 konima eshi kwa li ta kendabala okulanda ekondeina komunangeshefa woipupulu koSouth Africa. 

Oshiningwanima osha ningwa oshivike sha dja ko, nomukainhu ou oha di kEkuku mOshakati.

Omukulunhu koshikondo shokukonakona oimbuluma wopolifi moshitukukulwa shaShana, omupedu Commissioner Frederick Ndjadila okwa hokolola ta ti omukainhu ou okwa pula mumwainamati e li koLesotho opo e mu kongele apa hapa landwa omakondeina.

Otaku hokololwa kutya mumwainamati okwa yandja onomola yongodi e i kufa koFacebook kunakuninga oshihakanwa opo a dule okudengela ehangano li li koSouth Africa hali landifa omakondeina kombilixa.

Opolifi oya hokolola tai ti nakuninga oshihakanwa okwa kwatafana nonomola oyo ndele ta pula opo a tuminwe eendado domakondeina.

Nakuninga oshihakanwa okwa tuma oshimaliwa N$16 500 shokulanda ekondeina. 

Opolifi oya ti konima yefimbo omunangeshefa ou okwa pula natango omukainhu opo a tume oshimaliwa N$3 500 shokufuta olefa tai etelelele ekondeina laye.

Omukainhu ou okwa ka tuminwa natango etumwalaka konomola ya yooloka tali ti na tume oshimaliwa N$9 999 opo ekondeina laye li dule okupitifwa keengaba.

Okwa tuma oshimaliwa konomola yombaanga yaStandard Bank yaSouth Africa.

Opolifi oya hokolola tai ti efiku la landula ko natango omukainhu okwa tuminwa etumwalaka kutya na tume oshimaliwa N$5 000 kehangano hali longo omakondeina, ndele ta tumu.

Efiku la landula ko natango nakuninga oshihakanwa okwa tuminwa etumwalaka ta pulwa a fute N$8 999 opo a dule vati ekondeina laye li dule okushangifwa keengaba.

Okudja opo omukainhu ou okwa dimbuluka kutya mboli ota kengelelwa.

Opolifi oya ti omukainhu okwa kendabala okupula ko oshimaliwa shaye ashike ookalyamupombo inave mu nyakula pefimbo kwa li te va dengela.

Omakonakono opolifi otaa twikile moshikumungu eshi.

Opolifi oya kumaida oshiwana opo shiha tume vali oshimaliwa tete ngeenge tashi lande oinima komalungula molwaashi ovanhu paife ove lininga oikengelela.

-fhamalwa@nepc.com.na