Omukainhu weedula 26 okwa twakwa onghonga kovalumenhu vane pefimbo kwa li a hangika a kuminina okaana kaye keemwedi omuhoyi.
Oshiningwanima eshi osha ningilwa komukunda Ontananga B moshitukulwa shaShikoto momafiku a 08 Juli neudo.
Omupopiliko wopolifi moshitukulwa shaShikoto Inspector Ellen Nehale okwa hokolola ta ti nakuninga oshihakanwa okwa hangwa moixwa kovalumenhu vane ta di keendingosho efimbo loufiku.
Va ti okudja opo ovafekelwa ove mu lombwela opo a kale omutumba vo va shiive okuya naye moixulo.
Omukainhu vati okwa kala ina hala ashike okwa ningilwa omatilifo kutya otave mu dipaa.
lola tai ti okudja opo omukainhu okwa kufa mo okaana modikwa ndele ta longelwa oilonga youshada yopaixulo kovafekelwa aveshe. Ovafekelwa vati ove mu ningila yoo vali omatilifo kutya ina kuwa mokule shaashi otava kala va udike.
Omukainhu ou vati eshi a fika meumbo ina lombwela ovaneumbo vaye kutya okwa kwatwa onghonga shaashi vati okwa kala a tila okudipawa kovafekelwa shaashi ohava di pomukunda wavo.
Oshivike sha dja ko momafiku 25 nakuninga oshihakanwa okwa kala a didilika tavele koukainhu waye vati a ninga omatito nokonima yefimbo okwa ka lombwela mushiinda shaye kutya okwa li a kwatwa onghonga. Okudja opo okwa twalwa koshipangelo shaNandjokwe opo a ka mone epango lopaunamiti. Omukainhu ou oku li omunailonga womeumbo pomukunda Ontananga. Opolifi oya ti ovafekelwa ove shivike onghee otava ka kala va kwatwa po diva mekwatafano loshikumungu eshi.
Lwopokati opo omukainhu weedula 28 naye okwa kwatwa onghonga momafiku eshi a li 05 Juli neudo komukunda Ompembelonga mOshikoto.
Opolifi oya hokolola tai ti omukainhu okwa kwatwa vati onghonga ku mushiinda shaye konima eshi e uya meumbo lavo ta landifa eengodi dopeke.
Vati okudja opo omufekelwa okwa kufa mo ombele ta pula omukainhu opo vaye naye moixulo nongeenge ina hala ote mu dipaa.
Konima eshi omukainhu a kwa kwatwa onghonga okwa kala a tila okulopota kopolifi ashike okwa ka lombwela mushiinda shaye umwe nokonima mushiinda okwe mu lombwela opo a ka lopotele opolifi.
Oshivike sha djako momafiku 27 omukainhu okwa ka lopota kopolifi kutya okwa kwatwa onghonga ku mushiinda.
Omulumenhu ou okushivike ashike okwa faduka eshi auda kutya ota kongwa kopolifi.
Omakonakono opolifi otaa twikile moibofa aishe yomakwatonghonga.
Opolifi onghee ngaa tai kunghilile oshiwana opo shi kale tashi lopota oibofa yomakwatonghonga pefimbo opo opolifi i kale ya ninga omakonakono diva.
Onghee opolifi oya ti osha fimana ngeenge nakuninga oshihakanwa shokukwatwa onghonga ta lopota pefimbo opo a dule okukala a mona omayakulo opaunamiti diva. – fhmalwa@nepc.com.na