Omunafikola weedula 25 vati okwa li a kwatwa po ombambyona nokunyekwa oshimaliwa nongodi yopeke kovalumenhu vatatu.
Oshiningwanima osha ningwa mexuliloshivike komukunda Omayanga moshikandjohoololo shaKatana efimbo lokomatango.
Otaku hokololwa omukainhu ou a futifwa okwa ningilwa omatilifo edipao nekwatonghonga. Omukuainhu ote lihongela oupangi kofikola yoI-Care i li mOndangwa. Omupopiliko wopolifi moshitukulwa shaShana Inspector Thomas Aiyambo okwa hokolola ta ti nakuninga oshihakanwa okwa londa otaxi okudja kEkuku mOshakati a yuka koulefa vokOshikuku.
Omukainhu okwa hokololela Kundana ta ti motaxi okwa hanga mo ovalumenhu vavali. Vati omushingi okwe mu lombwela kutya ota ka pitula omulumenhu umwe koshitaashi shomahooli kOkatana.
Vati ova shinga nokupitula po omulumenhu oo nokushinga va yuka kOmayanga oko va kanghameke otuwa moixwa.
“Umwe womufekelwa okwa nukila nge pofingo nokufa ko ongodi yange yopeke omanga umwe okwa nyeka ko ondjato yange yoimaliwa omo kwa li mu na oN$2 300 yokufuta ofikola,” ta hokolola.
Okwa ti ovafekelwa ove mu lombwela a kufe mo eenomola dopaumwene ha longifa ngeenge ta patulula ongodi yaye opo va dule okulongifa ongodi yaye noupu.
Ta ti ove mu lombwela opo a dengele ovakulunhu vaye ta popi oipupulu kutya okwa pumbwa oshimaliwa shokufuta eshina lokofikola olo a teya. “Okudja opo onda dengela meme ndele ta tumu oN$2 000,” ta ti.
Nakuninga oshihakanwa okwa ti ovafekelwa ova twikila noku mu ningila omatilifo ve kwete eembele tave mu lombwele kutya na pule natango umwe womofamali yaye oN$1 000 shaashi osho sha hangwa mokandjato naashi a tuminwa kuina inashi wana.
“Okudja opo onda dengela meme mumwaina wameme noku mu lombwela oipupulu kutya onda pumbwa oshimaliwa shokufuta eshina lokofikola nde li teya. Okwa tuma oN$1 000,” ta ti.
Omukainhu okwa hokolola ta ti natango ovafekelwa ova ti oshimaliwa inashi wana molwaashi ova hala N$5 000, onghee ove mu lombwela opo a dengele ina natango a pule oN$2 000.
“Onda dengela meme andi pula oshimaliwa lwoshikando oshitivali nokonima meme okwa ka limbililwa ta pula nge omapulo kutya omolwashike handi pula oshimaliwa shihapu. Ovafekelwa ova lombwela nge opo ndi lombwele meme oshili kutya ondi li momake ookalyamupombo va hala okudipaa nge nokukwata nge onghonga,” ta ti.
Onghee konima eshi nda lombwela meme oshili okwa endelela opo a tume oshimaliwa oN$2 000 nokonima okwa dengela opolifi.
Okwa ti ovafekelwa ova dengela kaume kavo opo a endelele a ka naneko oshimaliwa kombaanga.
“Ovafekelwa ova faduka po va fiya nge moixwa. Otava shingi otuwa yoNissan March ilaula yonomola yaShakati ashike inandi i koneka,” ta ti. Nangombe Mwatange, ina yanakuninga oshihakanwa, nokwa ti okwa pandula eshi okaana kaye inaka longelwa omunyonena wopaixulo ile ka monifwe oshiponga.
“Okwa li ndi shi ngeenge ota ningi omashendjo eshi ta pula nge oshimaliwa. Onda endelela okutuma konima eshi a lombwela nge kutya oku li momake ovafekelwa,” ta ti.
fhamalwa@nepc.com.na