Auleria Wakudumo 

Omukainhu weedula 36 okwa tulwa moipandeko eshi vati a twa nokudipaa kaume kohonda yaye weedula dihe shivike shaashi vati e ya oku va talela po meumbo lavo. 

Oshiningwanima eshi osha ningilwa kofaalama yedina Aussenkehr moBloka ititano, Olomakaya lwopo21h00 lwaapo. 

Nakufya okwa tongololwa oye Elricho Hendrinks. 

Edi oda kolekwa komupopiliko wopolifi Deputy Commissioner Kauna Shikwambi. 

Otaku hokololwa omukainhu a li koshi yodungo pefimbo loshiningwanima. Omufekelwa vati ka li a hafela nakufya eshi e ya keumbo lavo nomulumenhu waye. 

“Okwa hovela okutanguna nakaume kaye kopaihole kombinga yomulumenhu oo e ya meumbo lavo. Mokati keenhamanana, nakuningwa oshihakanwa vati okwa kendabala okweeta ombili pokati kovaliholi ava ndele tava fe va xulifa okutanguna,” Shikwambi ta holola. 

Konima yokafimbo, vati ova twikila natango okulikupula omalaka. Omufekelwa okwa ya mondjato omo a kufa ombele ndele ta tu Hendricks mombadja. 

Hendricks okwa li a twalwa kokakilinika kopofaalama yavo ashike okwa xulifa omanga ta mono epango lopaunamiti. 

-wakudumoauleria@gmail.com