Omukainhu weedula 26 okwa xulifa konima eshi a tuwa nombele lwoikando ihamanho ku suwala waye pefimbo kwa li tava tanguna.

Oshiningwanima osha ningilwa kodoolopa yaKeetmanshoop oshivike sha dja ko keumbo lomufekelwa efimbo loufiku.

Nakufya okwa tongololwa oye Junita Isaacks omukalimo womolukanda Aroab.

Omukulunhu koshikondo shokukonakona oimbuluma moshitukulwa shaKaras omupedu Commissioner Nicodemus Mbango 

okwa hokolola ta ti nakuninga 

oshihakanwa okwa twala oikulya yaye keumbo lomufekelwa opo i ka tuvikilwe keumbo laye molwaashi ohai vakwa po okuhadi.

Otaku hokololwa Isaacks okwa ya keumbo lomufekelwa opo a ka tale oufila.

Opolifi oya hokolola tai ti efiku olo Isaacks okwa ya keumbo lomufekelwa lwoikando ihapu ta kala ko oikulya.

Vati omufekelwa okwa tameka okululilwa molwaashi Isaacks otai keumbo laye lwoikando ya yooloka ta pula eendja daye.

Okudja opo ova tameka okutanguna nokulituka.

Omufekelwa okwa ya meumbo ndele ta kufa mo ombele nokutwa mukwao.

Otaku hokololwa kutya omufekelwa okwa hombolwa kumumwainamati wanakufya.

Omufekelwa okwa holoka momhangu yaKeetmashoop  Etivali.

Okwa anyenwa omhito yokulifutila mo modolongo noshibofa shaye osha undulilwa komafiku 17 Febuluali 2025.

Okwa pulwa komhangu opo a ninge eindilo lahaende.

Ota pangulilwa oshibofa shefyo nomakonakono opolifi otaa twikile.

Opolifi oya kumaida oshiwana  opo shi kale shi na ombili noukumwe momidingonoko davo shaashi okudipaa nokulidenga itaku ulike efano liwa.

-fhamalwa@nepc.com.na