Omukainhu weedula 48 okwa xulifa konima eshi vati a pondwa momunino konhumba yoshimbelela osho kwa li ta li keenghali.
Oshiningwanima osha ningwa mexuliloshivike komukunda Onambugulu moshitukulwa shaShikoto efimbo lokomatango.
Nakufya okwa tongolwa oye Johanna Wilbard omukalimo womomukunda Onambugulu.
Omukulunhu wopolifi moshitukulwa shaShikoto Komufala Teopoline Kalompo-Nashikaku okwa ta ti Wilard okwa li aya koshivilo dimbuluko keenghali ndi li pomukunda wavo.
Opolifi oya hokolola tai ti Wilbard okwa tameka okukolola konima eshi a pondwa koshimbelela nokulidenga po.
Okudja opo okwa twalwa koshipangelo shaNandjokwe ashike vati okwa fika ko a xulifa nale shaashi kakwa li ta dulu okufuda.
Opolifi oya ti mOlomakaya eshi olutu laWilbard la tandwa okwa hangika e na onhumba yoshimbelela pomunino.
Onghee oidjemo otai ulike kutya okwa xulifa molwaashi a pondwa konhumba oyo kwa li itai dulu okupita pomunino.
Opolifi oya kumaida oshiwana opo shi kale sha kotoka shiha pone omakipa ile omanhumba akula ombelela molwaashi osha nyika oshiponga.
– fhamalwa@nepc.com.na