Omukainhu weedula 33 vati okwe li mangelekela konduda yomulumenhu waye pefimbo omulumenhu aya koilonga.
Ota ku hokololwa kutya omukainhu ou vati okwa hangika meemhango ina djala oikutu.
Oshiningwanima osha ningwa Omaandaxa koAussenkehr koshitukulwa shaKaras efimbo lomutenya.
Aussekehr onhele oyo ha ku li kolwa omandjembele.
Nakufya okwa tongolwa oye Mashe Kambungu omukalimo womuAussenkehr.
Omukulunhu koshikondo shokukonakona oimbuluma moshitukulwa shaKaras omupedu Commissioner Nicodemus Mbango okwa hokolola ta ti omukainhu ou okwe li tuwa komulumenhu waye konima eshi a dja koilonga.
Ota ku hokololwa kutya omulumenhu okwa dja mo meumbo efimbo longula aya koilonga naashi a lukila keumbo okwa hanga omukainhu waye e li meenhango a xulifa. Mbango okwa hokolola ta ti oshikumungu eshi osha pumbwa omakonakono omoule.
Okwa ti olutu laKambungu ola twalwa koshipangelo shaKeetmanshoop opo li ka ningilwe omakonakono.
Omukainhu ou ina fiya po omukanda tau yandje ouyelele kombinga yefyo laye.
Oshiningwanima shikwao, okamatyona keedula 18 oka xulifa konima eshi vati ke li mangelekela monduda yokunangala.
Oshiningwanima osha ningwa mexuliloshivike momukunda Omakango moshitukulwa shaHangwena.
Nakufya okwa tongolwa oye Valombola Jason Nghihangakenwa omukalimo womukunda Omakango.
Opolifi oya hokolola ti oshivike sha djako Etitatu okamatyona aka oka xwika po tete onduda yako yokunangala.
Okudja opo Nghihangakenwa okwa pewa onduda imwepo omu ta nangala.
Okwe li tuwa efimbo lokomatango e li meemhango kovaneumbo vaye.
Ina fiya po omukanda tau yandje ouyelele kombinga yefyo laye.
Oshiningwanima shikwao, omukainhu weedula 29 okwa xulifa konima eshi a tuwa nombele komulumenhu waye weedula 22.
Oshiningwanima osha ningwa moWindhoek Omaandaxa efimbo longula.
Nakufya okwa tongolwa oye Frieda Amadhila omunailonga kombaanga.
Opolifi oya hokolola tai ti omukainhu ou okwa li tave li denge nomulumenhu waye naashi oka eta opo a tuwe nombele monhulo.
Amadhila okwa xulifila mondjila yokuya koshipangelo shaKatutura.
Omufekelwa okwa tambulilwa moshipangelo ta mono epango shaashi okwa mona oshiponga momunhino.
Oshiningwanima shikwao, omukainhu weedula 29 Lena Williams okwa xulifa konima eshi vati a tuwa nombele lwoikando ya yooloka komulumenhu waye mu kulu.
Oshiningwanima osha ningwa koUsako moshitukulwa Erongo keumbo lomukainhu ou.
Ota ku hokolwa Williams ove na okaana nomufekelwa ou.
Opolifi oya hokolola tai ti omufekelwa okwa ya keumbo laWilliams nokumulongela omunyonena.
Konima eshi omufekelwa a longa oshimbuluma okwa kufa po okaana kaye kokakadona keedula nhatu ndele tai nako.
Okaana oka monika ke li monghalo iwa, nomufekelwa okwa kwatwa po.