OSHAKATI – Elelo lyondoolopa lyOshakati osho wo omukalimo gumwe kEhenye oya huulile muunyengwi, sho anuwa ya li ye na okukundathana kombinga yehumokomeho tali ningwa koExtention 1 kEhenye.
Elelo lyondoolopa lyOshakati olya tameke okulonga poExtention 1 mpoka pwa longekindhwa oopolota 200, ngaashingeyi tapa tulwa omayakulo agehe. Extention 1 kEhenye nolukanda Oneshila oya topolwa ashike kondjila yimwe pokati, mpoka pwa kala pe na omukunda tagu ithanwa Ehenye.
Nonando omagumbo gomiti gamwe ga tembudhwa po kelelo lyondoolopa omolwehumokomeho, aakalimo yamwe oya tsu ominwe mevi, taya ti itaya tembudhwa.
Omunamukunda Antonius Amugongo ngoka a ningi ethimbo ta kondjithwa a tembudhwe po okwa ti, elelo lyondoolopa olya ikuthila oveta okulonga iilonga yalyo mopolota ye. “Onda li nda mono ashike oopala dha dhikwa komeho gegumbo lyandje, sho nda dhengele omunambelewa gumwe okwa yamukula ndje kutya oye dhi tula po ashike okuyelekanitha etale lyi li popepi negumbo lyandje,” ta ti ngaaka. Amugongo okwa ti, okwa tindi okuza po mpoka oshoka iimaliwa ta uvanekelwa iishona, ye ita pewa mpoka ta yi.
Ta ti, elelo lyondoolopa itali longitha omilandu dha tulwa po okuungaunga nomatembu gomapya. “Opolota ndjika oyi na ooheketa dha thika 18, ihe elelo lyondoolopa olya li lya uvanekela ndje ashike N$600 000,” ta nyenyeta ngaaka. Ta gwedha ko kutya aanamukunda oyendji otaya nyenyeta oshoka oya taalela uupyakadhi wokutembulwa, taya futwa oshimaliwa oshishona yo kaaya na mpoka taya tulwa.Omukuluntu melelo lyondoolopa lyOshakati Timoteus Namwandi okwa ti oya kala nokuninga iigongi okugandja uuyelele kombinga yetompelo lyokweeta omayakulo poExtension 1.
“Opo tu thike nena mpaka otwa li twa hala okupopya naAmugongo, kutya twa thiki, naashoka twa hala okuninga po, ihe natango okwa tindi,” ta popi ngaaka. Namwandi okwa fatulula kutya shoka ya hala ehumokomeho ashike. Ta ti, mpoka ye li opwa longekidhwa oopolota 200, moka tamu ka pewa aakalimo yomOneshila mboka taya ka kala ye na ehalo okuya po. “PoExtension 1 otapu ka tungwa okupitila mooprojeka dhokutunga omagumbo. Elalakano okuhulitha po oombashu,” ta ti ngaaka Namwandi okwa ti Oneshila otayi ka tulwa pomuthika gondoolopa, nelalakano lyokuhanagula po olukanda.
Ta ti, oya ninga nale omapekapeko, no taya ka tameka mbala konima ya mana okutula po omayakulo agehe poExtention 1. Namwandi okwa kumagidha wo oshigwana shi longele kumwe naanambelewa mboka taya ka thika pomagumbo gawo ngele taya ka kala ya hala uuyelele wa gwedha po.
Elelo lyondoolopa lyaShakati nando lya kala nokutembudhila omalukanda kehala limwe kOnawa, olya ti omalukanda ge li gatano itaga ka tembudhwa. Omalukanda ngoka itaaga tembudhwa ongaashi Oneshila, Okandjengedi, Evululuko, Ompumbu osho wo ombinga yimwe yUupindi.
Omahala ngoka otaga ka tulwa ashike pomuthika gwondoolopa.
Mayola gwondoolopa yaShakati Leonard Hango, okwa ti hamalukanda agehe mOshakati ge na oopolota dhi na uumwene wevi.
“Moomvula ntano twa taalela otatu kala twi ipyakidhila nokuyambula po omalukanda mOshakati, oku ga tula pomuthika gopandoolopa,” ta fatulula ngaaka. Ta gwedha ko kutya, aakalimo yomomalukanda ngoka taga ka tulwa pamuthika gondoolopa, oya pewa epitikilo oku ka ninga omayindilo gwokupewa oondokumente dhuumwene wevi.
“Eyindilo ohali ningwa uuna mwene gopolota a futu N$30 okumona ondokumente yehala lye,” ta ti ngaaka.
Hango okwa fatulula kutya ngaashi ehumokomeho lya fuma ko, ondokumente ndjoka oya simana kukehe omukalimo a kale e yi na oku mu yambidhidha noompumbwe dha yooloka monakuyiwa.
“Otwa kala nokukamambadhala okuyambula po ondoolopa yaShakati ayihe opo yi kale yi li mefano ewanawa, sho ooshoka twa tembudhile omalukanda gamwe komahala hoka ku na aantu ye na iiyemo yi li pevi osho wo mboka yaa na nande nande,” ta popi ngaaka.
Ta popi ta ti, shika natango oye shi ningile ombinga yimwe yUupindi, Evululuko osho wo Okandjengedhi.
Ta gwedha po ta ti, oye li momusholondondo, onkene kehe olukanda lwa hupa ko mOshakati otalu ka mona omauwanawa osho wo eyambulepo.
Omunashipundi melelo lyondoolopa yOshakati Hofni Mutota ota ti omalukanda ngaashi ombinga yimwe yolukanda lwaPohamba olwa tulilwa po nale omayakulo gamwe, ngaashi olusheno nomeya osho wo omayakulo gamwe gamuni.
“Otandi kumagidha oshigwana kaashi dhengele we oombashu momalukanda moka, oshoka elelo lyondoolopa olya yalula nokumeta nale lya mana, naashoka otashi shunitha iilonga yawo monima,” ta popi ngaaka.