Auleria Wakudumo 

Oshikondo shoimuna mouministeli wounamapya, owa lopota etukuko lomukifi weembulwa moshikandjohoololo Nehale Lya Mpingana, moshitukulwa shaShikoto. 

 Omunambelewakulunhu moshikondo shomayakulo oimuna Dr. Johannes Shoopala okwa ti omukifi ou owa monika momafiku 12 no 13 Novemba neudo mofaalama imwe momukunda Onalusheshete. Vati natango omukifi ou owa didilikwa yo momikunda da dingilila Onalusheshete. 

Shoopala okwa holola ta ti fiyo opapa, oshikondo osha lopota omwaalu weengobe 24 da kwatwa komukifi ou da kwatelwa unene vati peemhanga doinamwenyo nhatu (Edhilankono no1, Kanepolo Post noPetenena Post) neengobe 8 dali tadi ulike omadidiliko omukifi ou vati oda fya. 

“Omukifi weembulwa oo ohau kwata eengobe neengalangobe, hau kwata oshipa neenhumba osho hashi eta elondo loupyu, oilyo yolutu ya dida, oitumba kolutu nopongahatu imwe efyo,” Shoopala ta ti. 

Oshikondo shomayakulo oimuna osha fatulula kutya omukifi weembulwa ohau tandavelifwa koupuka ngeenge ongobe ya lika kokapuka oko haka tandaveleke omukifi oo ile fimbo limwe ohau tandavelifwa komikifi dimwedonhumba. Moikando ihapu, oshikondo oshati omukifi ohau tandafelifwa koupuka. 

Omukifi weembulwa vati ohau yakulwa novanafaalama otava kunghililwa opo va kwashilipaleke kutya eengobe davo oda vendwa oshoyo okupombela oipuka pomidingonoko davo. 

Eengobe odo dina omadidiliko omukifi weembulwa otadi dulu oku pewa ekwafo lopaunamiti okuyandja eepela deevitamine, eepela dokudengapo ouyehame oshoyo eepela dokukwafela odindo okukwafela etandavelo leembakiteli mongobe ngaashi todi pewa nokuleshelwa komudokotola woinamwenyo. 

Opo ku keelelwe etandavelo lomukifi nokukwashilipaleka eamono loimuna, oshikondo shomayakulo oimuna osha holola kutya otashi ka tula moilonga okatendo koundjolowele woimuna, (Act 1 of 2011), okutula po eendjidikila tadi shikula nhatu.  Omalinyengo ile okushinga eengobe moshikandjohoololo shaNehale Lya Mpingana otaa ka pitikwa ashike meengobe odo itadi ulike omadidiliko omukifi noda teelelwa di kale da vedwa oule womafiku 21 manga inadi shingwa. 

Eengobe tadi yi meefaalama ile ponhele opo pa didilikwa omukifi nadi kale da vedwa omafiku 21 manga inadi ya monhele omo.  Eendjidikila edi vati inadi kwatela mo oinamwenyo oyo ya ufwa i dipawe molwa omadidiliko omukifi a divilika. 

Ovanamapya novanaimuna aveshe ava ve na eengobe inadi vendwa otava indilwa nokukunghililwa opo va twale oimuna yavo kovenda yomukifi weembulwa. 

Oshikondo shomayakulo oimuna otashi indile elongelo kumwe lovakwashiwana shi longele kumwe nokukwatelapo eemhango da tulwa po okukeelela nokufinda omukifi weembulwa. 

-wakudumoauleriagmail.com