Auleria Wakudumo
Oministeli younamapya nounaimuna oya lopota etukuko lomukifi wepunga momukunda Okapundja, moshitukulwa shaKunene.
Omukifi ou taku hokololwa u na omukwayu vati owa monika meengobe hetatu domoufita weengombe 30 domoufita umwe. Imwe yomudo oya fya.
Omukifi wepunga oo omukifi weengobe neengalangobe hau kwata epunga oshoyo eenhumba odo da dingilila onhulo osho hashi eta elondo loupyu, efudaano lihapu, ongobe tai kolola nosho tuu.
Oshikondo shomayakulo oimuna osha fatulula kutya omukifi wepunga ohau tandavele ngeenge oshinamwenyo osho shihe na omukifi osha i mekwatafano noshinamwenyo shi na omukifi wepunga. Osha nyika oshiponga osheshi oinamwenyo ei ihai ulike omadidiliko diva ohai tandavelifa omufiki, nohashi kala shidjuu okuamena oimuna ikwao komufiki.
Omukifi wepunga ihau hakulwa, nonghene oinamwenyo ei ya kwatwa komukifi ou oya pumbwa okulikalela molwaashi otai andjakaneke omukifi koinamwenyo ikwao. Ovanhu ihava kwatwa komukifi wepunga, onghene ovanhu kave li oshihakanwa shomukifi watya ngaho.
Opo ku amenwe oimuna, oshikondo shomayakulo oimuna nokatendo kouhaku woinamwenyo Act 1 of 2011, ova tula po eendjidikila tadi shikula odo di na okulongifwa.
Eengobe itadi ka pitikwa okuya nokudja moshikandjohoololo shaPuwo, kakele keengobe odo tadi ka dipawa moule weevili 48 metonatelo lovanambelewa.
Ekufo lombelela (epunga) kongobe ya fya meni ile kondje yoshikandjohoololo shaPuwo ola ngabekwa.
Omashakeno nomakufombinga eengobe peenhele donhumba shilindi manga.
Omainda omeendjila nao otaa ka kala e li peenhele di lili noku lili opo ovanambelewa va kwatele po eemhango nokukwatela po elandulafano la tulwa po.
Ovanamapya novanaimuna aveshe ava ve na eengobe inadi vendwa otava indilwa nokukunghililwa opo va twale oimuna yavo kovenda yomukifi wepunga.
Oshikondo shomayakulo oimuna otashi indile nefimaneko linene opo ovanamapya novanaimuna osho yo oshiwana ashishe shi longele kumwe nokukwafela neemhango odo da tulwa peenhele opo ku ngabekwe nokufinda omufiki wepunga.
-wakudumoauleriagmail.com