Opolisi moshitopolwa shaShana oya manga po omukiintu gwomimvo 55, sho anuwa a kwata koonkondo okanona kokamati komimvo 18 kokamwainagona.
Omukuluntu gwopolisi moshitopolwa shaShana Naftal Lungameni Sakaria okwa ti oshiningwanima shoka osha holoka mesiku lyohole, omasiku sho ga li 14 gaFebuluali nuumvo, momukunda Oshekasheka. Otaku hokololwa kutya omukiintu ngoka okwa kondjitha okamwainagona ka ye naye miihulo, ka li ka yi kegumbo lye, anuwa nelalakano lyoku ke mu talela po. Anuwa omukiintu ngoka okwa li ta ti ke uvite nawa, sho osho nee sha etitha kamatyona e ke mu talele po. Anuwa sho kamatyona a li a thiki megumbo, omukiintu ngoka okwa li e mu ithana mondunda ye yokulalala, e ta pata pomweelo. Otaku hokololwa kutya, omukiintu ngoka okwa li a tameke okukwata okamati kuukuluntu, te mu pula opo a ye naye miihulo. Nonando anuwa okamati kakwa li ka nyanyukilwa shoka tashi ningwa, omumwayinagona okwa li e ka kondjitha, te ka hula iikutu nokuya nako momilalo.
Opolisi oya ti, omulumentu ngoka oye mwene a gandja ehokololo, nomakonakono gopolisi otaga tsikile.
Olundji iiningwanima yi li ngaaka ohayi uvilwa unene aalumentu oyo taya kwata aakiintu koonkondo, ihe uupyakadhi mboka nawo owa taalela aanona yaamati, oshowo aasamane.
Omuhungimwenyo gomomikunda Saima Ashipala okwa ti omakwatokoonkondo oga indjipala moshilongo, notaga ningilwa unene aantu ayihe.
“Aalumentu olundji ohaya kala ya tila okulopota iiningwanima yi li ngaaka, nonando otayi ya hepeke,” ta popi ngaaka.
Ta ti, sho osho shoka olundji aantu haya ikutha oomwenyo, nonando inaya kala taya ulike omadhidhiliko taga limbililike.
Ta gwedha po ta ti, oshigwana kashi uvite ko kutya ekwato koonkondo oshike.
Ta ti, omulumentu ngele okwa etelwa omayiuvo komukiintu pamukalo kaagu li mondjila, nena ngaaka okwa kwatwa koonkondo, oshoka ine shi ninga kehalo lye.
“Aanamibia oya pumbwa omalongo kombinga yomakwato koonkondo, oshindji otashi ningwa momagumbo ihe osha holekwa, oshoka aantu kaye uvite ko nenge inaye shi tala ko onga ekwato koonkondo,’’ ta ti ngaaka.
Ashipala okwa kumagidha kehe ngoka a taalela uupyakadhi wu li ngaaka a thike paahungimwenyo nenge kopolisi yi li popepi naye opo a mone omakwatho.
Ta ti, ekwato koonkondo ihali ningwa ashike kaalumentu.
vkaapanda@nepc.com.na