Opolisi moshitopolwa shaShana oyi li metifa okukonakona oshipotha shekwatombambyona, sho omukiintu gwomimvo 29 a li a mangwapo kopolisi sho anuwa a yaka po ohanona ya kuume ke yoomwedhi ndatu.
Sha ikolelela komukuluntu gwopolisi moshitopolwa shaShana Naftal Lungameni Sackaria, oshiningwanima shoka osha ningwa oshiwike shika mOshakati.
Otaku hokololwa kutya omukiintu ngoka okwa kala nokufundja kuume ke komiihole kutya okwa li e na etegelelo nokwa mona okanona kokakadhona.
Ta ti, omolwiilombo mbyoka a li a lombwele kuume ke komiihole, ethimbo lyokufala ohanona koohe okwa li lya thiki, ihe kakwa li pe na okanona shili.
Oshoka anuwa osha kala tashi mu nyenyetele, ye a kwatwa kuumbanda sho a kala nokuyambidhidhwa komulumentu ngoka, okwa li a kwatwa ishiwe kedhiladhilo lyoku ka yaka po ohanona yakuume ke.
Lungameni okwa hokolola kutya, omukiintu ngoka anuwa okwa li a yi kukahewa ke, kEvululuko mOshakati, ta ti okwe ya okutalela po, nonando elalakano olyukuyaka po ohanona.
Anuwa okwa li a pula kuume ke opo a lele ko kohanona, omanga i ipyakidhila niilonga yilwe megumbo.
Ta ti, shoka anuwa okwa li sha nyanyundha kuume ke, oshoka ohashi kala oshidhigu okugwanitha po iilonga ye omanga e li oye awike, omolwohanona. Nonando elalakano lye enditha kuume ke ke li shi.
MOshiwambo ohaku ti, omutima gwamukweni okalongo ki ili.
Otaku hokololwa kutya omukiintu ngoka konima yethimbo okwa li alaleke kuume ke ta ti, otayi puushiinda pe na okatuthi kontumba.
Shoka yina yohanona okwa li e shi pitike, oshoka oku uvite kutya omwana oku li ashike nakuume ke, sigo a ka mona ethimbo lya ninga ele omukiintu ngoka inaa galuka nomona.
Lungameni ta ti yina yokanona okwa li a tameke okukonga omukiintu ngoka puushiinda mpoka a li a lombwelwa kutya kuume ke okwa yi kOndangwa.
Olukongo sho lwa li lwa yi mo, omukiintu ngoka anuwa okwa li a adhika kOndangwa komulumentu gwe, a fala ohanona ndjoka anuwa kuhe, “kuume ke komiihole”.
Opolisi oya ti, nonando paShiwambo aanona ngele taya falwa koohe lwotango ohaya zalekwa oondiwi, kape na natango uuyelele wothaathaa ngele okanona hoka oka li ka zalekwa nenge ke na sho ka ningwa.
Omukiintu ngoka okwa li a mangwa po ethimbo olyo tuu ndyoka.
Opolisi oya kumagidha oshigwana, unene aakiintu ya hulithe po iinima yi li ngaaka oshoka ohayi ka eta omaupyakandhi galwe natango.