ONGWEDIVA – Omukiintu gwomimvo 38 oku li monkalo ombwiinayi sho oohauto dhoobakkie, mwa kwatelwa moka a li dhi idhenge mumwe ongula yOmaandaha. 

Omugandji gwomauyelele gopolisi omukuluntu moshitopolwa shaShana Inspekta Thomas Aiyambo okwa ti, oshiningwanima osha holoka lwopotundi 07h00 mepandaanda enene kOngwediva, komeho gositola BH Motor Spares. Omukiintu ngoka anuwa okwa teka omagulu agehe noombati. 

Omuhingi gumwe, omukulukadhi gwomimvo 55 naanona yaali yomimvo ntano ayehe osho wo omuhingi omukwao, ngoka e li omulumentu gwomimvo 40 otaya mono uuhaku moshipangeo shaShakati, noonkalo dhawo odhi li hwepo. 

Aakulukadhi mboka yaali naanona oya li mohauto yimwe, yo ohaya zi megumbo limwe. 

Aiyambo okwa ti, oshiponga osha etithwa kohauto ndjoka ya fadhuka po, sho ya yi komeho gayimwe yomoohauto. 

Mokukambadhala okuhenuka ohauto ndjoka ye ya komeho, omuhingi ngoka gwomukiintu okwa nyengwa okupangela ohauto sigo ya londo pokati kopate tayi ki ipuma mumwe nohauto ndjoka tayi hingwa komulumentu ngoka a li ta zi kOngwediva. 

Omukiintu, ngoka a li a humbata omukiintu omukwao naanona yaali, okwa li ta hingi u uka kOngwediva.

Aiyambo okwa kwashilipaleke kutya inapu hulitha omuntu poshiponga mpoka.

Opolisi moshitopolwa shOtjozondjupa nayo oya lopota aantu yatano ya hupu moshiponga ookilometa hetatu okuya kOtjiwarongo Osoondaha. 

Oshiponga osha holoka sho etayiyela lyohauto ya li ya londa anuwa lya topa.

Aantu mboka otaya mono uuhaku miipangelo kOtjiwarongo.

Natango Osoondaha yoshiwike sha zi ko, aantu ye li yatatu oya kanithile oomwenyo dhawo moshiponga shohauto, sha holoka ookilometa 20 okuya mOtjiwarongo.

Omasiku ga zi ko opolisi oya li ya lopota aantu ye li omugoyi ya hulitha miiponga yoohauto momasiku ashike gatatu.

Opolisi otayi kumagidha oshigwana shi hinge nuukeka aluhe, sho shi hulithe po okuhingilila.

-vkaapanda@nepc.com.com.na