Ongwediva – Omhangulilo yaMangestalata mEenhana oya undulila oshibofa shedipao omo omulumenhu a dipaela mushiinda pongeleka molwa oikombo ya ya mepya laye.
Mangestalata momhangulilo mEenhana okwa undulila oshibofa shaSimon Kaudinge (58) opo shi ka dike komafiku Mai 31 2019, nokwe mu anyena opo e lifutile mo. Kaudinge, okwa holoka monhangu mOmaandaxa oshivike eshi ta tamanekelwa edipao lomukulunhu weongalo oo vati a dja yoo pomaushiinda avo.
Otaku hokololwa Kaudinge a longa oshikumwifa tashi difa omaxwilili eshi vati a dipaa Joel Nghidishange (42) e mu teta nekatana, ndele te mu tu vali nombele, molwaasho vati ounona vambulavo yaNghidishange va efa oimuna iye mepya nokulya oilya yaKaudinge.
Oshiningwanima eshi shilaula noshikumwifa osha ningilwa pongeleka Efidi Anglican Church, momukunda Efidi pokati kOndobe nEenhana.
Otaku hokololwa Ndishishange pamwe novakwao vomongudu-lwiimbo va li momuti u li pondje yongeleka tave lilongekida omaimbilo eshi Kaudinge e ya po noku mu ponokela nekatana.
Kaudinge vati okwe ya ashike a yukilila momuti omo mwa li ongudu yolwiimbo yee te lipopile ta ti “otamu fi omunhu nena omu. Omu na oku fya omunhu nena omu”. Ye vati ota kala omutumba ta tale mokati kovanhu omo mwa li Nghidishange. Opo nee mbela eshi a ninga etokolo okwa nhukila Nghidishange ndele te mu tete nekatana momutwe. Ashike Nghidishange okwe shi pondola, ta dulu Kaudinge eenghono ndele te mu tula koshi. Manga e li koshi, Kaudinge okwa pweya mo ombele noku twa Nghidishange.
Eshi e wete kutya okwa longa oilonga yaye i kukutu vati okwa ya pomatele e li popepi nongeleka ndele ta ka kosha oilwifo yaye ohonde.
Nghidishange vati ponhele opo okwa dja po ngoo ta ende ashike, ta twalwa popate opo ngeno ku ka lefwe okataxi, ye a twalwe koshipangelo kEenhana, ashike konima yokafimbo okwa tameka ta ongotele, nokuxulifa, taku fekelwa kutya okwa kanifa ohonde ihapu.