Omukulunhuwiliki moministeli yelongo Sanet Steenkamp ota ti ovalongifikola aveshe, novanafikola a va vena eedula kondja 18 ovapumbwa okuya opo katunhilwe ovenda yombuto yoCovid19.
Meenghundafana a ninga naKundana omukulunhuwiliki welongo okwa hokolola ta ti oshili sha fimana sho otashi kwafele ngeenge ovalongifikola novanafikola vatunhilwa oCovid19 shaashi eshi otashi vakwafele neenghono opo va ha kwatwe kombuto ei.Onghee okwa ti nashikale oshinakuwanifa shomulongifikla keshe opo a kale atunhilwa omukifi woCovid19.
Steenkamp okwa denga omufindo ta ti eetundi odina oku twikila ngaashi sha kala shito, onghee ovakulunhufikola navatule po omalandulafano kombinga nghee ovanafikola vena okuya keetundi. “Oulapi vokomilungu nava ndjalwe nawa keefikola, ovakulunhufikola navakwashipaleke kutya eefikola odina oikwafifo ya wana yokukelela ombuto yoCovid19,” Steenkamp ta ti.
Okwa ti ovakulunhu vomihandjo navakwashipaleke kutya omilandu doCovid19 oda tulwa po komihandjo opo ovanafikola va kale va amenwa. Steenkamp okwa ti kapena vali efimbo tuu nande, onghee efimbo opaife kovalongifikola novanafikola vondodo onhi 10, onhi 11 nonhi 12 lokulonga noudinini.
“Ohandi kunghulile ovalongi aveshe opo va twikile nokulonga nelitulemo moilonga yavo unene tuu ovalongi vondodo onhi 11 nonhi 12 ovapumbwa okukala tava kwafela ovanafikola a va vena oupyakadi moilongwa yavo manga ina vatameka okushanga ekonakona lavo,” Steenkamp ta ti. Okwa ti oministeli yelonga oina oshisho notai lalakanene kutya novanafikola novalongifikola noshoyo ovanailonga aveshe voshikondo shelongo ovena oikwafifo ya wana opo va kale va amenwa kombuto yoCovid19. Onghee okwa ti oshili oshinakuwanifa shavo okukala va yandja oikwafifo yokuli amena.
Okwa weda po ta ti okwa didilikwa ovanafikola ita veluufa komilandu edi datulwa po doCovid19, onghee okwa kunghulila ovalongifikola opo va kale vena oshinakuwanifa kutya keshe omunafikola okwa ndjala okalapi kaye ko komulungu efimbo keshe kofikola shaashi ovanafikola navo oveli oiyakanwa yombuto ei.
“Ovadali navo nava kale vena oshisho shoku yandja elongo kounona ngheene vena okukala veli amena koCovid19,” Steenkamp ta ti.