WINDHOEK-Omulumentu gwepipi lyuukuluntulela gwomimvo 68 okwa si eso lyombaadhilila sho a iyaha nondjembo yemwene ee ta si poshiponga mpoka.
Oshiningwanima shoka osha holoka nduno, mOsoondaha ya zi ko, sha ningilwa pomukunda gwedhina Okafitu kaKatanyange, moshikandjohogololo shaOutapi.
Omukonaakoni gwiimbuluma moshitopolwa shaMusati, Omupevikomufala Moses Simaho okwa koleke onkundana ndjika ta ti kutya ngashingeyi omaso giipundjamene oge li gi igalala moshilongo onkene ta kumagidha aakwashigwana mboka taya adhika komadhilaadhilo gokwiidhipaga ya mone ehungomwenyo.
“Aantu ngele oya adhika kombepo ndjoka naya kambadhale opo yaa idhipage. Naya popye pwaamboka ye li popepi nayo opo ya wape okufalwa kaahungimweno nenge koongeleka opo ya wape okukeelela omaso goludhi ndoka,” osho a hokolola ngaaka.
Okwa tsikileko ta ti kutya aakwanezimo woo mboka ye li naapambele yawo naya kale woo taya kotokele ngele oya mono aapambele yawo ya ziyalala nenge taya popi omaso otashi vulika ya adhika kombepo ndjoka, opo ye ya fale kaahungimwenyo.
Simaho okwa ti nakusa okwi i kutha omwenyo nondjembo yombistoli yuule woomilimeta omugoyi yedhina Makaro (S/No.6635) nokwa iyaha momutse nokusila mpoka.
Nakusa ngoka okwatongololwa onga Kambo Michael Omunamibia noku li omukalimo gwokomukunda Oshihenge moAngola.
Okwa ti omudhimba gwanakusa ogwa falwa koshipangelo shaOutapi, opo gu silwe oshimpwiyu gwo tagu falwa nduno kokila kOkahao opo gu ka tandwe.
Okwa hokolola kutya nakusa ina thiga po omushangwa gwasha tagu popi kutya omolwashike a idhipaga. Ashike omakonaakono gwopolisi otaga tsikile.