Omukulupe, ena uulema okwa si sho anuwa a pile mombashu ye mehuulilo shiwike.
Sha ikolela kepeko lyopolisi oshiningwanima osha holoka moshitopolwa shErongo kOmatjete lopotundi 23h00, momukunda Okarui Okape.
Otaku hokololwa kutya omukulupe gomimvo 73 okwa li a pile megumbo lye lyoshipeleki, moka kwa li hazi oye awike.
Opolisi oya ti, ombashu ndyoka okwa li ya hwama omulilo sigo yapipo thiluthilu omanga e li meni.
Olutu lwe kalwalitalu vulu oku tongololwa oshoka nalo olwa pipo pipo. Okwa hokololwa omukulupe nguka a Ii a ihulu okumonika komukwanezimo gwe lopotundi 20h00 esiku ndjoka.
Otaku fekelwa olamba ndyoka kwa li halongitha yomahooli kwa li ya topa nokufika ondunda ye yokulala.
Nakusa okwa tiwa oye Mathias Tjirimezumo. Aakwanezimo ye oya tseyithilwa. Omwedhi gwa ziko moshitopolwa shErongo omulilo okwa li gwathigi aantu yathika 20 kaaye na omalukalo sho omagumbo gawo ga li ga fikwa po thiluthilu komulilo.
Sha ikolelela kepeko lyopolisi omulilo ngoka okwa li gwa faalele oomwenyo mbaali, omukiintu gomimvo 38 oshowo okanona komimvo mbali.
Oshiningwanima shoka okwa Ii sha holoka molukanda Twaloloka mOmbaye. Otaku hokololwa kutya omulilo ngoka okwa li gwa etwa kokalehite hoka ka kwa li ka ndhimwa sho ya kalala.
Iiwike iyali ya piti, natango opolisi oya lopota omukiintu gumwe kwa li apile mombashu sho a li a katalela po kuume ke komiihole koWindhoek.
Maria Nekundi ngoka hazi molukada Twaloloka okwa ti, elelo lyondoolopa lyOmbaye olya pumbwa okulonga nuundhiginini opo kukandulwe po uupyakandhi wolundhi nduka.
Ta ti, kehe konima yomwendhi nenge mbali molukanda lwawo omuna okusa omuntu a pila megumbo.
“Shika otashi tula oonkalamwenyo dhetu moshiponga, oshoka olundji katushi omulilo ethimbo hagu tameke nege hagu zi, otuuvu ashike aantu taya tondoka. Otuna uunona tu li nawo muka mboka itawu vulu okukwiigamena una wa adhika komulilo owo awike,” ta a popi nongeyo. Ta ti, ihaya kotha we ya mbonyoka oshoka oya tila.
Ta indile ta ti, ngele kapena shoka tashi ningwa po aakalimo yomomalukanda naya pewe omalongo nkene yena okuihumbata , una taya longitha sha shanika omulilo.
– vkaapanda@nepc.com.na