■ Victoria Kaapnda
OHANGWENA-Egumbo lyamwene gwomukunda, omukokele gwomimvo 88 Trofimus Hatupopi, momukunda Eembaxu mOshitopolwa shaHangwena olya hanagulwa po thiluthilu komulilo.
Otaku hokololwa kutya omulilo ogwa etwa kuunona wa li tawu kambadhala okufika ewiliwili pethimbo ya li taya tenteke po ulalelo, sha ningwa komatango gOlyomakaya ga zi ko.
Egumbo ndyoka lyomiti lya li lyi na oondunda heyali lwaampoka olya pipo thilthilu kumwe niipeleki yalyo naashihe sha li mo osha pila mo, uunona mbuka uyali owu li kohi yomimvo 10.
Shimoneni Kandume, omutekulu gwaHatupopi, ngoka oye a li a lombwele onzonkundaneki ndjika onkundana ndjika okwa popi kutya, omulilo ngono ogwa ka hula ashike sho aashinda naamboka ya li puukamba ya mono omulilo tagu wayele pombanda nokutondoka ye ke gu dhime.
“Otatu pandula Kalunga oshoka inamu pila nando omuntu, oshoka omulilo sho gwa tema inamu adhika aakuluntu megumbo, omwa li ashike uunona mboka wa li tau tenteke po uulalelo”. Kandume ta ti ngaaka.
Ta popi ta ti ashihe okuwete okwa li sha pondolwa pakwatho lyaKalunga, oshoka omulilo ngoka ogwa li omunene nogwa li tagu fulu okufaalele oomwenyo dhuunona mboka wa adhika mo. Ta hokolola ta ti okanona kamwe ok ali ka mono ewiliwili ndyoka, noka li ka kutha oshihenguti ngeno ke li fike nomulilo ogwa kwata ondunda yomwiidhi ndjoka ya li ya pungula iinima oyindji e tagu taandele gu uka kondunda oonkwawo.
Kandume ta ti omulilo ogwa hanagula po iinima yawo oyindji lela yongushu yiimaliwa yi vule N$25 000, oombete, oonguwo, ookofa dhiikutu nosho wo oosikopa, ookila dhokutalaleka, iikwatelwa yokelugo, omausila, omakunde, iilya momashisha, iiyelelwa, omambo gaanona gosikola, oonzapo dhomavalo nodhosikola, uumutse , uukalata womahogololo,
omikanda dhi ili nodhi ili, iizalomwa yi ili noyi ili yaakuluntu
naanona, ayihe oya pila mo.Oya thigwa pomutenya, lela inaya thigwapo nando onasha noye li ya pumbwa ekwatho lela okuzilila
kaasihenda nosho tuu.
Egumbo alihe lyomiti olya hanagulwa po komulilo ngoka noya pumbwa wo ekwatho lyokutungulula egumbo lyawo ndyoka lya halakanithwa po shekesheke.
Ngoka e na olukeno naashoka ezimo ndyoka lya li lya ningilwa komulilo ina keelelwa nando okukwathala naashoka ena po, oshoka oye na okutotulula okuza kokasindo sigo ookombeete.
Nakehe ngoka ta vulu oku kwathela nakambadhale okupitila kOpolisi yaHangwena oshoka oshiningwanima shoka osha li wo sha lopotwa kopolisi.