Omukulupe weedula 62 okwa fya eshi a dengwa komonamati nomushi wokutwa oilya shaashi vati ha kala noku mu ponda.
Oshiningwanima eshi osha ningilwa momukunda Wabona koshitukulwa shaZambezi meumbo lavo Etivali.
Nakufya okwa tongolwa oye Lukaezi Niemand Sibonena, nokwa xulifila koshipangelo shaKatima Mulilo Etitatu efimbo longula.
Omupopiliko wopolifi moNamibia omupedu Commissioner Kauna Shikwambi okwa hokolola ta ti omufekelwa okwa kwatwa po nokwa holoka momhangu.
Oshibofa shaye osha undulilwa komafiku 13 Marisa nomakonakono opolifi otaa twikile.
Oshingwanima shikwao, omulumenhu weedula 57 okwa fya eshi a dengwa kovakwapata vaye pefimbo kwa li ta kendabala okutwa mumwainakadona nombele komukunda Kabungo moshitukulwa shaZambezi Etivali.
Opolifi oya hokolola tai ti nakufya vati okwa anyenwa N$5-00 kondenge yaye eshi kwa li tei pula oshimaliwa, konima eshi ina pewa N$5-00 okwa tameke ta kutuka ondenge ndele ta kufa ombele yokapi noku mu twa.
Vati omulumenhu okwa twalwa koshipangelo shaKatima Mulilo eshi a dengwa noku xu lifa Etitatu.
Ka pena omunhu a kwatwa po nomakonako opolifi otaa twikile.
Opolifi onghee tai kumaida oshiwana opo shi kale alushe tashi lopota omahepeko omomaumbo pefimbo opo ku kelelwe ovanhu vaha ninge oihakanwa yokudipawa nokulemanekwa. fhamlwa@nepc.com.na