Omukulupe gwomimvo 72 okwa si moshiponga shohauto pethimbo ya li anuwa taya zi kuukongo kaawu li paveta.
Oshiningwanima shoka osha holoka kofaalama tayi ithanwa Klein Nauas momundhingoloko goWindhoek mOmaandaha.
Omupopiliko omukuluntu gwopolisi moshitopolwa shaKhomas Inspector Elifas Kuwinga okwa ti aalumentu ye li yatano anuwa okwa li yi ikuthile oveta oku ka dhipaga iiyamakuti kofaalama hoka haya longo.
Kuwinga okwa ti, oya li ya longitha ohauto yoLand Cruiser yonomola yaWindhoek ndjoka ya li tayi hingwa kugumwe gomaafekelwa mboka, ye kee na omukanda gokuhinga.
Aalumentu mboka anuwa okwa li ya tidha onguluwe, sho omuhingi a nyengwa okupangela ohauto ee tayi gu. Ta ti aalumentu yatatu oya ehamekwa unene, omanga yaali ya ehama kashona.
Kuwinga okwa ti aalumentu mboka oya li ya dhengele ohauto yopaumwene okuza koRehoboth ndjoka ya li ye ya fala koshipangelo.
Omukulupe ngoka okwa kwashilipalekwa a hulitha sho a thiki poshipangelo.
Opolisi oya ti otayi tsikile okukumagidha oshigwana shi hulithe po onkalo yokwiikuthila ooveta momake gawo okuya muukongo inaau pitikwa.
Omugandji gomauyelele muuministeli womidhingoloko, iihwa nomatalelepo Romeo Muyunda okwa ti, iinamwenyo ayihe iishona niinene oya gamenwa, na inayi pitikwa okudhipagwa.
“Iinamwenyo ayihe yomomakuti nomiihwa inayi pitikwa okudhipagwa kaape na epitikilo okuza kuuministeli womidhingoloko,” ta fatulula ngaaka.
Ta ti, iiyamakuti ayihe oya gamenwa, onkene ngele gumwe okwiikuthile oveta momake ge ee te shi ningi, oku na okupewa egeelo.
Muyunda okwa ti, moka omwa kwatelwa iiyamakuti ayihe, naambyoka iishona ngaashi oonikitha, uulimba, ookakala nosho tuu.
“Kehe oshinamwenyo shi li kombanda yevi oshi na oshilonga, nosha pumbwa okugamenwa opo kaashi dhipagwe po,” ta fatulula ngaaka.
Ta gwedha po kutya oyendji kaye na ontseyo kutya iinamwenyo mbyoka iishona nayo oya gamenwa, nohaya ikuthile ooveta dhawo yene oku yi dhipaga.
Muyunda okwa kumagidha oshigwna shi ikaleke kokule niinamwenyo mbyoka opo kaashi iyetele omaupyakadhi.
“Iiyamakuti ngaashi oompanda, oondjamba oshowo oongaka oonkalamwenyo dhawo odhi li moshiponga oshoka oyo unene hayi dhipagwa omolwongushu yiilyo yawo,” Muyunda ta ti ngaaka.
Ta ti, nonande ope na egameno lya kwata miiti okukeelela iiyamakuti yi dhipagwe kaashi li paveta, natango oshigwana ohashi kambadhala okulongitha oompito adhihe okukonda ooveta ndhoka.