Omukulupe weedula 75 okwa kwatwa onghonga ndele ta nyekwa oshimalia shaye shi fike N$2 100 komulumenhu womushiinda shavo. 

Oshiningwanima osha ningwa Osoondaxa efimbo loufiku pefimbo kwa li a kofa komukunda Omatangala moshitukulwa shaHangwena. 

Chief Inspector Foibe Petrus wopolifi moshitukulwa shaHangwena okwa koleka oshiningwani eshi. 

Okwa hokolola ta ti omufekelwa weedula 21 okwa kwatwa nota pangulilwa oshibofa shekwatonghonga. 

Opolifi oya hokolola tai ti omufekelwa okwa ya monduda yomukulupe ndele te mu ningile omatilifo kutya ote mu dipaa e kwete ekatana. 

Vati okwe mu nukila ndele te mu longele omunyonena wopaixulo. 

Oshiningwanima shikwao, okaana komido heyali oka kwatwa onghonga komulumenhu womushiinda shavo weedula 24. 

Oshiningwanima osha ningwa komukunda Omahenge moshitukulwa shaHangwena oshivike sha dja ko efimbo loufiku. 

Opolifi oya hokolola tai ti omufekelwa okwe li va kela monduda younona ndele ta hondama koshi yombete. 

Otaku hokololwa kutya eshi ounona va ka nangala omufekelwa omo a hangika monduda. 

Vati okwa nukila okaana ndele ta kwata onghonga. 

Okwa kwatwa po nota pangulilwa oshibofa shekwatonghonga. 

Natango moshitukulwa shaHangwena oshivike sha dja ko omwa lopotwa okaana keedula 15 ka kwatwa onghonga komulumenhu womushiinda shavo. 

Oshingwanima osha ningwa komukunda Oilyateko efimbo loufiku. Moshitukulwa shaShana omwa lopotwa okaana keedula hetatu ka kwatwa onghonga pefimbo kwa li ta kadi kofikola. 

Oshiningwanima osha ningwa omwedi wa djako komukunda Ohendjele. 

Otaku hokololwa kutya omufekelwa okwa taata ovanafikola ndele ta kwata po kamwe noku ka kwata onghonga. 

Omufekelwa oku na omido 16 noku li omushiinda peumbo opo hapa di okaana. 

Ovadali ova kumaidwa va kale va tonatela ounona vavo shaashi oibofa yomakwatonghonga oya ninga ihapu paife. 

-fhamalwa@nepc.com.ma