Festus Hamalwa
Omukulupe weedula 69 a kwatwa po eshi vati a denga omukulukadi waye neengonyo moshipala meumbo lavo konima eshi kwa li tava tanguna.
Oshiningwanima eshi osha ningwa Etivali momukunda Etambo moshikandjohoolololo shaKankolo, moshitukulwa shaShikoto efimbo loufiku lwopotundi 20h00.
Nakuninga oshihakanwa naye omukulupe weedula 63, hava di meumbo limwe nomufekelwa.
Omupopiliko wopolifi moshitukulwa shaShikoto Inspector Ellen Nehale okwa hokolola ta ti omufekelwa okwa kala shito nokuningila omukainhu waye omatilifo kutya ote mu dipaa.
Vati efiku oshiningwanima sha ningwa omufekelwa okwa kufila omukulukadi waye ombele eshi kwa li e mu kwete pofingo a hala oku mu dipaa.
Omufekelwa ota holoka momhangu nokwa pangulilwa oshibofa shomahepeko omomaumbo. Omakonakono opolifi otaa twikile.
Moshipopiwa shaminista woukashikekookanhu nonghalonawa yokaana Doreen Sioka osho kwa li a popya kefiku lokutula moilonga okuxulifa po omahepeko a ningilwa ounona novakainhu mOngwediva, okwa ti oshiwana osha pumbwa okukala tashi ningilwa oikonga yokuyandja ehongo nouyelele kombinga yomahepeko oukashikekookanhu momikunda.
“Eepologalama dihapu oda pumbwa okutotwa po ngaashi ovaxungimwenyo momikunda, okuyandja ehongo kounona voumati nghee ve na okukala tave lihumbata ngeenge ve li novakainhu,” ta ti.
Okwa weda po ta ti ouministeli waye otau kwashipale kutya otau twikile nokula po omilandu da yooloka odo tadi dulu okushunifa pedu omahepeko oukashikekookanhu moshilongo noshoyo okukwashipaleka eameno lounona novakainhu.
“Omahepeko oukashikekookanhu naa lopotwe pefimbo.
Oshiwana nashi kale tashi topolelafana ouyelele nghee shi na okukala sha lopota ovanhu ovo tava ningile vakwao ominyonena momaumbo,” Sioka ta ti.
Oshiningwanima shikwao, omulumenhu weedula 35 okwa kwatwa po eshi vati a kwata okaana keedula 14 onghonga noku ka mitika.
Opolifi oya ti oshiningwanima eshi osha ningwa momwedi Aguste modoolopa Karasburg meumbo lomufekelwa ashike ouyelele owe uya kombada omwedi ou eshi ovakulunhu va ka mona kutya okaana oke na eteelelo.
Omufekelwa okwa holoka momhangu noshibofa shaye osha undulilwa komafiku 25 aJanuali manga taku ningwa omakonakono.
fhamalwa@nepc.com.na