Opolisi yaNamibia oya tseyitha oshiningwanima shi nyanyaleka, shomukulupe gwomimvo 64 a yugwa iinima ye, ta kwatwa koonkondo nokudhipagwa.
Sha ikolela komugandji gwomauyelele gwopolisi moshilongo Kauna Shikwambi, oshiningwanima shoka osha holoka pokati ko00:00 no 07:40, yEtiyali, koRehoboth, Block A.
Otaku hokololwa kutya nakusa okwa li a adhika a hulwa iikutu yimwe, nokwa kutulwa omunino oshinima kaashi shiwike. Nakusa okwa tseyika nedhina Helena Wimmert.
Opolisi oya tseyitha kutya nakufekelwa moshiningwanima shika gwomimvo 29, okwa mangwa po.
Omakengelelo
Opolisi yaNamibia oya kumagidha oshigwana shi kale uupathi unene ethimbo ndika lyetameko lyomumvo, oshoka aafuthi otaya longitha oompito adhihe okuyuga aantu iimaliwa.
Ndika olyo ethimbo aavali taya longitha oshimaliwa okulanda iilongithomwa yosikola, oshowo okutuma aanona koosikola.Opolisi oya kumagidha aavali ya kumagidhe aanona yaapwikine ku kehe ngoka eya pooha dhawo, kashina omukiintu nomulumentu, mboka okalyamupombo.
Omugandji gwomauyelele moshitopolwa shaShana Thomas Aiyambo okwa ti, aafuthi okwali ya kengelele aalumentu yaali yaakwiilongo noshimaliwa shi thike N$20 000 oshowo omaliko galwe.
Aalumentu mboka ye li yane taya fekelelwa oshiningwanima shoka anuwa kayeshiwike. Ta ti, ndyoka ethano ewiinayi kaakwiilonga oshoka otaya kala yena uumbanda woku talela po Namibia oshoka okuna aafuthi.
“Ota tu kumagidha oshigwana shi kale sha kotokela aafuthi ethimbo alihe oshoka oyiipyakindhila nokuyuga oshigwana,” ta kumagidha ngaaka.
Ta ti, kehe gumwe na kale ena onomoa yopolisi opo ku vule okulopotwa iiningwanima inaayi pumbiwa moshigwana.
Mehuulilo shiwike okasitola kaachina mOshakati, kUupindi, ngaashingeyi okapata sho kali ka tutwa po kaafuthi.
Opolisi natango otayi indile moshigwana ngele opena ngoka ena uuyelele wa mboka ya longo ngaaka opo alopotele opolisi.
Omukuluntu gwopolisi moshitopolwa shaShana Nafatal Lungameni Sakaria oshiwike sha ziko okwali a kumagidha oshigwana shaa holeke we uuyelele kombinga waafuthi, ihe naya lopotwe.
“Otwa hala okulongela kumwe noshigwana opo tu vule okusinda iimbuluma moshitopolwa.
Ngele ekwatathano ndyoka lya kala po lya kola, nena iimbuluma itayi holoka we, noshigwana otashi kala mondoolopa sha manguluka,’’ ta popi ngaka.
vkaapanda@nepc.com.na