Omukulupe weedula 85, omulumenhu okwa dengwa pomutima konima eshi a kanifa oshimaliwa shaye oN$27000 okupitila pamukalo wokatoo.

Oshiningwanima osha ningwa momafiku 3 omwedi ou kodoolopa yaKahao moshitukulwa shaMusati.

Senior Inspector Anna Kunga ou e li omupopiliko wopolifi kOmusati okwa koleka oshiningwanima eshi.

Okwa hokolola ta ti omukulupe okwa dengelwa ongodi komulumenhu ta popi oipupulu kutya oha longele mombaanga.

Kalyamupombo ou okwa pula nakuninga oshihakanwa opo a yandje eenomola daye dopaumwene dombaanga.

Okwe mu lombwela kutya okwa findana oshimaliwa onghee okwa pumbwa okuyandja eenomola daye opo a dule okutuminwa oshimaliwa shaye.

Konima eshi a tuma eenomola edi a pulwa, kombaanga yaye okwa lopota oshimaliwa sha dja ko.

Natango, moshitukulwa shaMusati omwa lopotwa omulumenhu weeedula 55 naye a kanifa oN$4600 konima eshi a tulwa mokatoo.

Oshiningwanima osha ningwa omafiku 31 omwedi wa dja ko omudo 2025.

Opolifi oya hokolola tai ti omulumenhu ou okwa dengelwa ongodi komulumenhu ta popi oipupulu kutya ye omunambelewa wopolifi ta longele koshikondo shokukonakona oimbuluma.

Opolifi oya hokoleka tai ti nakuninga oshihakanwa okwa li nale a patulula oshibofa shi nasha natango nokatoo omo kwa li a kanifa oshimaliwa omudo wa dja ko.

Kalyamupombo ou okwe mu dengela ta ti kutya okwa pumbwa okuyandja eenomola dopaumwene daye dombaanga opo a dule okutuminwa oshimaliwa osho a kanifa tete.

Okwa hekwa kutya oshimaliwa osha monika mboli omunhu oshikengelela.

Diva diva oshimaliwa shaye osha lopota sha dja ko kombaanga yaye.

Oimaliwa aishe i na i monika momakonakono opolifi otaa twikile.

Efiku keshe opolifi otai londwele oshiwana okupitila keeradio osho yo okuninga oiongalele tai yandje ehongo kombinga yo katoo ashike oshiwana natango otashi twikile okuninga oihakanwa.

Ehangano loMTC na lo oha li ningi oikonga yokuyandja ehongo nouyelele kombinga ya katoo ashike ovanhu otava twikile okutulwa mokatoo.

Okwa didilikwa ovakulupe ovo vali ovanashilonga ve li mopendjela paife ovo unene va ninga oihakanwa yokatoo.

Oshiwana osha kumaidwa opo shi xulife po okuyandja eenomola davo deembanga dopaumwene kovanhu vehe shivike osho yo okuya meenghundafana novanhu ngeenge ve li keembanga.

fhamalwa@nepc.com.na