ONDANGWA – Omulumenhu weedula 25 ta longele metanga leameno okwa kwatwa po eshi vati a dipaa kaume kaye weedula 41 ndele te mu tete koilyo yaye youlumenhu. Omufekelwa ou vati konima eshi a teta ko oulumenhu wa mukwao okwa ya nayo keumbo ndele tei xwike po nokonima okwei fudika meumbo lambulavo. Olutu laye ole li tuwa li li metale lomeva onyata, Osoondaxa efimbo longula modoolopa yaNdangwa komukwashiwana kwa li ta ende ponhele opo. Nakufya okwa tongolwa oye Salom Nikanor aa dile komukunda Okakwiyu. 

Omufekelwa ota holoka momhangu yamengestalata waNdangwa nena. Ota pangulilwa oshibofashedipawo. Omukulunhu koshikondo shokukonakona oimbuluma wopolifi moshitukulwa shaShana omupedu komufala Fredrik Ndjadila okwa koleka oshiningwanima eshi shinyanyalifa. 

Opolifi oya hokolola tai ti omulumenhu ou okwa hangika a kupulwa metale lomeva ashike okwa tetwa eefukwa odo di li oilyo yaye youlumenhu. 

Opolifi oya kala nokuninga omapekapeko osho yo okupula moshiwana kwau e na ouyelele kombinga yoshiningwanima eshi. 

Omufekelwa ou okwa kwatwa po Omaandaxa efimbo lokomatango mOndangwa konima eshi oshiwana sha yandja ouyelele kopolifi. 

Opolifi oya koleka tai ti omufekelwa ohava di pomukunda umwe nanakufya, vo ookaume. Otaku hokololwa kutya omufekelwa vati okwa sha ngifa nakufya ou e li kaume mehangano olo ha li shangifa ovanhu okupewa oshimaliwa shokulongifa peenghali ngeenge omunhu a xulifa. 

Opolifi oya hokolola tai ti konima eshi omufekelwa a ningilwa omapulapulo okwa popya kutya okwa dipaa kaume kaye shaashi okwa hala oshimaliwa osho ha shi yandjwa kehangano olo. 

Vati omufekelwa okwa lombwela opolifi kutya oilyo youlumenhu yakaume kaye okwe fudika meumbo lavo nokuixwika po.

Umwe womukwapata wanakufya okwa lombwela Kundana ta ti okwa kumwifwa koshiningwanima eshi molwashi omufekelwa okwa li ve na oukaume muwa nanakufya. 

“Okwa li alushe hava ende ve li lamba vau ka keendingosho. 

Ohatu a nye okuitavela kutya omufekelwa oye a longela kaume kaye omunyonena ou shaashi okwa li ve na ekwatafano liwa,” ta ti. 

Okwa ti omufekelwa oku na okukala a landela nanakufya omalodu efiku olo shaashi okuhole oku mu landela omakende malula. 

Oshiningwanima esh i shomulumenhu a tetwa eefukwa osha tilifa oshiwana omo shina oumbada kutya mboli monooli omu na omidamba tadi longele ovanhu ominyonena. 

Elenga la kula ta li wilike oshitunda shUukwambi Chief Ndilimani Iipumbu okwa ti ovanhu paife otava longo oikulumuna tashi pitile pamukalo wokulya oupule. 

“Ovanhu vamwe ohava kala va tumwa va ka longele vakwao ominyonena nelalakano loku li ninga ovakengeli,” ta ti. 

Iipumbu okwa ti onghundana ei otailulumikenenghonoshomunhu a tetwa oilyo youlumenhu waye. 

Okwa ti mopaife ovanhu otava longele vakwao oilonga youshada molwashi ove na omalalakano onhumba. 

Oshiwana osha lombwela Kundana tashi ti paife osha kwatwa koumbada wokuenda nookaume ile okaahewa kavo shaashi paife ovanhu otava longelwa ominyonena kuvakwao vopopepi. 

fhamalwa@nepc.com.na