Victoria Kaapanda
ONGWEDIVA-Omukwanilwa Fillemon Shuumbwa okwa indile oshilongo ashihe shaNdonga shi longele kumwe nombili nelandulathano, kaashi na nando omanathano, ngoka ga kala ethimbo mOndonga, ta ti ombili nayi pangele nedhiminepo olya pumbiwa.
Ndhoka odha popiwa kOmukwanilwa Olyomakaya ya zi ko sho kwa li a langekwa pambelewa onga Omukwanilwa gwaNdonga pegumbo lye, mOmukunda Onambango moshitopolwa shaShikoto.
Shuumbwa okwa landula Omukwanilwa Immanuel Kauluma Elifas, ngoka a li a hulitha nuumvo muMaalitsa 26, moshipangelo shepangelo mOnandjakwe mepipi lyomimvo 86. Shuumbwa okwa ningi Omukwanilwa omu-18 okulela oshilongo shaNdonga.
“Ngame onda tambula ko ewiliko lyokulela Ondonga, okuza komuthigululwakalo gwoomeme nootatekulu ya tetekele nale, ihe otandi ka lela Ondonga ndaa na ndjolola, kehe ngoka tandi ka lela moshilongo shika otandi ke ya kwatela mekwamo limwe”,Shuumbwa a gana.
Ta ti okwa hala oku ka longela oshilongo she nuudhiginini noshili, nuuyuki oshowo nombili.
Shuumbwa sho kwa li ta langekwa kaakuluntu yElelo lyaNdonga Vilho Kamanya oshowo Anneli Mbumba, okwa li wo a pewa omapaya, egala lyi li moshipa shongwe, oshowo egonga onga oonkondo dhokulela oshowo okugamena kehe shoka tashi ponokele oshilongo shaNdonga.
Omukwanilwa okwa li wo a pewa osinzi, ndjoka kwa li a fatululilwa kutya oyo ya talika ko yin a ongushu yimwe nongombe moshilongo shaNdonga, nosha kala ngawo kutya uuna wa mono osinzi ohayi falwa kuuwa.
Aakwashigwana ye vule 5000 oya li ya thiki esiku ndyoka kuuwa nokuninga oontaliyiho melangeko lyomukwanilwa gwawo omupe Shuumbwa, noya li ya tyapulile pamwe elelangeko kape na nando omayimbo nuuwinaya washa.
Omupevipresidente Nangolo Mbumba oshowo minista e na sha neyambulepo lyoondolopa nonkalo yokuushayi Peya Mushelenga oya li ya thiki nokukwatela komeho elangeko llyomukwaniilwa Shuumbwa.