Aanona yaali ye na omimvo yimwe nane oya si sho anuwa ya pile mondunda omanga kwa li ya kotha.

Sha ikolelela kopolisi moshitopolwa shErongo oshiningwanima osha holoka mehuliloshiwike kolukanda DRC koSwakopmund moshitopolwa shErongo.

Otaku hokololwa kutya omulumentu gumwe okwa li a kotha sho a papudhuka moomposi komulilo gu li mondunda ye, eta matukile pondje.

Sho anuwa a yi pondje, okwa mono ishewe omulilo tagu fike ombashu yopuushiinda, hoka a li a matukile, nokukambandhala okuteya po omweelo.

Opolisi oya ti omulumentu ngoka okw ali a shike a pondola okuhupitha okanona komimvo heyali.

Otaku hokololwa kutya yina yaanona ka li e li mo ethimbo lyoshiningwanima naashoka sha eta omulilo inashi tseyika natango.

Aakwanezimo oya tseyithilwa, ashike opolisi inayi tseyitha omadhina goonakusa.

Omakonaakono gopolisi oge li metifa.

Natango omwedhi gway i omulumentu gwomimvo 31 okwa si sho a pile mondunda kOutjo sho kwa li ta kambandhala okuhupitha aanona yaali mboka ya li mondunda tayi pi.

Otaku hokololwa kutya nonando a li e shi pondola okuhupitha aanona mboka okwa li a shuna mo ishewe moka ina za we.

Aantu ye vule po50 oya thigwa powala sho oombashu dhawo dha pi po komulilo oomwedhi oonshona dha piti po kolukanda Havana koWindhoek mepandaanda tali ithanwa Oshakati.

Omulilo anuwa ogwa fike po oombashu ndhoka thiluthilu, no inaku tseyika kutya ogwa etwa koshike. 

Opolisi oya lopota kutya nonando oshigwana sha kala noku kambadhala okudhima omulilo ngoka inashi pondola sha, kadhimamulilo sho a ka thika oombashu odha pya po nale.

Opolisi oya kala nokukumagidha oshigwana shi kale aluhe tashi dhimi thiluthilu omililo uuna sha mana oku gu longitha, yo ya kwashipaleke kutya itagu vulu okweeta oshiponga.

-vkaapanda@nepc.com.na