Onkaanka-Oongoloneya yiitopolwa yokonooli Omusati, Oshana oshowo Oshikoto oya kunkilile oshigwana shi kale uupathi wiiyamakuti ya zi mEtosha nomomatonatelwahala omolwa omulilo ngoka gwa ningi esiku tagu fike.
Ngoloneya gwoshitopolwa shaShikoto Sacky Kathindi okwa ti okwa moniwa oondjamba tadhi ende kondje, onkene aakalimo komahala ngaashi Okashana naangoka go popepi naya kotoke.
“Oshigwana nashi kale sha kotoka sho shi lopote mbala ngele sha mono iiyamakuti,” ta ti ngaaka.
Ngoloneya gwoshitopolwa shaShana Hofni Iipinge okwa kumagidha omikunda dhili popepi nombuga nadho dhi kale uupathi.
“Iiyamakuti oya monika yuuka lwokUuvudhiya, onkene ina mu kwata ethimbo okulopotela aanambelewa ngele mweyi mono,” ta kumagindha ngaaka.
Ngoloneya gwoshitopolwa shaMusati Immanuel Shikongo okwa ti iimuna itayi tauka mo omolwa omulilo.
“Ota tu kumagindha wo oshigwana shaa taaguluke oompango shi ikuthile ooveta sho yene, oshoka iiyamakuti oya nika oshiponga, ihe naya lopotele aanambelewa,” ta ti ngaaka.
Aanafalama mboka yena oohambo dhawo kombinga hoka otaya nyenyeta iimuna yawo ya halakana komulilo ngoka tagu fike, onkene sigo ompaka kayena uuyelele ngele imuna yawo oya pya po nenge oyili ashike mombuga.
Omugandji gomauyelele muuministeli womindhingolo nomapashiyono Ndeshipanda Hamunyela okwa ti omuloka go nuumvo, ogweya nomauwanawa ogendji, moka mwa kwatelwa omwiindhi kehe pamwe.
“Omolwa ombepo ndyoka ya tameka ku yele nuumvo, omililo nadhi kwatwe nawa, okuyanda embugaleko,” ta ku magidha ngaaka.
Hamunyela okwa kumagidha oshigwana shi kwate omulilo nuukeka okuyanda epeya oshowo ekanitho lyiimuna oshowo oomwenyo dhaantu.
Ta ti, oshigwana nashi kale sha ndhindhilika kutya omulilo ohagu taandelekwa kombepo, onkene nashi kale tashi kondolola omililo uuna tashi tema okukwashilipaleka kutya omulilo ogwa dhima thiluthilu.
Ta ti, okukeelela okuvule okupanga, onkene ngele shika osha keelelwa itashi holoka.
“Omulilo ogu na okukondololwa opo kaagu holoke, shika nashi tameke na kehe gumwe. Oshigwana nashi kunkule omwiidhi pooha dhomagumbo oshowo kehe pehala omulilo tagu vulu oku andjakana gu e te epeya,” ta popi ngaaka.