ONGWEDIVA –Omuntu nguka kaandi shi kutya oye lye, ita hulitha po okulandula ndje. Onda loloka oku fadhuka po. Ombili aatnu yandje, ondi mu hole amuhe…
Ngoka ogo omatumbulo ga nyolwa kuSimon Shilongo Shikundu, a li omulongwa mosikola yOshiputudhilo shopombanda sha Unam, mendiki lyaHifikepunye Pohamba mOngwediva, omanga inaa ikutha omwenyo.
Kundana momasiku 6 Novemba 2019 okwa li a nyola kutya oonzo dhoka dha li poshiponga odha hokolola kutya Shikundu okwi ikutha omwenyo konima sho a adhika kaalongi ta yaka ekonaakono. Ashike uuyelele mbuka kagu na uukwashili.
Nonando Kundana ka li a mona eyamukulo okuza koUnam pethimbo lyokuya komanyanyangidho, aanasikola ooyakwao yaShikundu mboka ya nyola ekonaakono naye, oya ti ehokololo ndjoka kali shi lyoshili.
“Ka pu nande omuntu gumwe a kwatwa ta yaka ekonaakono esiku ndjoka, nakupopya oshinima shoka ota fundju. Ishewe, Shikundu haye kwali omuntu gwoku yaka ekonaakono, aantu yoku ninga ngawo opo ngaa yeli,” omunasikola gumwe ta ti.
Omunasikola omukwao ta ti okwa mona sho Shikundu e ya mongulu yekonaakono esiku ndjoka, na kali a kuutumba kokule naye. Ta ti okwa koneke nawa e ya a lata esiku ndjoka nokwali ta monika a fa a ngwangwana.
Dhika odha kolekwa wo komukulu gwanakusa Shikundu Ndinelago ngoka a ti aakwanezimo oya kambadhala okuuva uuyelele guna sha naashoka sha lopotwa kuKundana okuzilila kaanambelewa moshiputudhilo, ihe uuyelele mboka Unam kegu shi.
Ta ti oya kala owala ye shishi kutya okandenge oka kala taka piyaganekwa koombepo dha nyata, noka kala noku shi hokolola okuza muJuni nuumvo.
“Okwa kala ha lombwele ndje kutya opu na omuntu he ya owala kuye ta ti ne mu landule. Anuwa omuntu ngoka oha kala owala emu wete nawa kolutu, ihe ihemu mono komutse opo andola e mu tongolole.
“Esiku ndjoka a imangeleke onda popya naye pangodhi, ta lolombwele ndje kutya otaka lesha ashike okuna ngaa ombepo ndjoka tayi mu hili mokwako opo anuwa e yi landule. Onde mu kumagidha kutya na galikane, na leshe owala oshoka okuli omakonakono nangame ota ndi mu galikanene.
“Onda galikana shili ashike omagalikano getu ina ga kwatha sha. Oshinima shoka osha li shi na oonkondo shi mu vule,” Ndinelago Shikundu ta ti. Sha ikwatelela kuuyelele gwopolisi, Shikundu okwali a imangeleke nongodhi mongalashe yiihauto, megumbo lyandjawo mOngwediva momagumbo taga ithanwa Ongwediva Better Housing. Nakusa ngoka okwa yambukile momukunda Uukwananga kEunda moshitopolwa shaMusati.
Kundana ota gandja ombili kaakwanezimo, omolwa ehokololo ndjoka lya gwedha keyeme lyaakanezimo ya nakusa nguka. Nota gandja omahekeleko.