Omulumenhu weedula 33 okwa nyekwa otuwa yaye eshi a ponokelwa kovalumenhu vatatu ve kwete eendjebo mbali Etitano efimbo loufiku lopotundi 00h30 kOmafo moshitukulwa shaHangwena.
Omukonakoni woimbuluma wopolifi moshitukulwa shaHangwena omupeduCommissioner Zacharia Amakali okwa hokolola ta ti omulumenhu okwa hangika e li pondje yeumbo notuwa yaye koolyamupombo ndele tave mu ningile omatilifo kutya otave mu dipaa ngeenge ina yandja eeshapi dotuwa.
Nakuninga oshihakanwa okwa dengwa nondjebo moshipala ndele ova fekelwa tave mu mange noshilapi komesho.
Opolifi oya ti eshi ovafekelwa va manga nakuninga oshihakanwa ove mu tula motuwa ndele tava i naye nokonima ove mu umbila moixwa komukunda Ohaingu u li moshitukulwa shaHangwena ndele tava faduka po notuwa yaye.
Otuwa oi na oluvala hali vema yoToyota Corolla yonomola N 7261 EN.
Opolifi oya ti ka pe na omufekelwa a kwatwa po natango yoo notuwa ina monika.
Omakonakono opolifi otaa twikile mokukonga otuwa ei.
Opolifi oya indila moshiwana kwaau e na ouyelele kombinga apa pe na otuwa ei opo oshiwana shi kale sha lopotela opolifi keshe i li popepi.
– fhamalwa@nepc.com.na