Omulumenhu umwe okwa xulifa konima eshi vati a tuwa nombele komukainhu weedula 32 ou e li kahewa kaye.
Oshiningwanima eshi osha ningilwa moKuisebmond modoolopa yaWalvis Bay mexuliloshivike meumbo.
Nakufya okwa tongololwa oye Vilho Haufiku weedula 48.
Omupopiliko wopolifi moshitukulwa Erongo Inspector Ileni Shapumba okwa hokolola ta ti Haufiku okwe uya keumbo a dja keendingosho a kolwa nokonima okwa tameka okudenga omufekelwa oo e li kahewa kaye.
Opolifi oya ti naashi osha ka eta opo omufekelwa a kufe ombele nokutwa Haufiku.
Otaku hokololwa kutya omufekelwa kave li mekwatafano lopaihole naHaufiku ashike okwa li e ke mu talela po.
Opolifi oya hokolola tai ti omufekelwa okwe litwala ye mwene kopolifi konima a longa oshimbuluma.
Oshiningwanima shikwao, omukwashiwana waAngola okwa fya eshi vati a tuwa neembele nokudengwa kukaume kaye ou e li naye yoo womukwashiwana waAngola.
Oshiningwanima eshi osha ningwa mexuliloshivike molukanda Omashaka mOndangwa.
Nakufya okwa tongololwa oye Benesiu Ndaningalenga weedula 23.
Omupopiliko wopolifi moshitukulwa shaShana Inspector Thomas Aiyambo okwa hokolola ta ti ovalumenhu ava okwa li tava nwine omalodu pamwe pondingosho.
Vati okudja opo ova tameka tava tanguna naashi osha eta olwoodi pokati kavo vavali.
Opolifi oya hokolola tai ti konima yokafimbo omufekelwa okwa ya keumbo laye a ka tale ombele yokapi.
Omufekelwa vati okwa nukila Ndaningalenga noku mu twa nombele medimo loikando itano nokonima okwa kufa odopi ndele te mu denge komutwe.
Nakuninga oshihakanwa okwa xulifa pefimbo okwa li e li mondjila ta twalwa koshipangelo shaNandjokwe.
Omufekelwa okwa faduka po konima eshi a longa oshimbuluma, onghee opolifi oye lipyakidila noku mu konga.
Opolifi otai indile moshiwana kwaau e na ouyelele kombinga yomufekelwa ou opo oshiwana shi kale sha lopotela opolifi keshe i li popepi.