Omulumenhu weedula 28 okwe liyasha nondjebo konima eshi vati a nwefa omahooli mOndangwa ndele ta faduka po ina futa.
Oshiningwanima osha ningwa mexuliloshivike mondjila pokati kOndangwa nOngwediva pomukunda Opoto efimbo lomutenya.
Nakufya okwa tongololwa oye Ndeulita Toivo.
Opolifi oya hokolola tai ti Toivo okwa monifa yoo vali otuwa yomunhu oshiponga mopate nokufaduka po mefiku tuu olo.
Otaku hokololwa kutya omulumenhu efiku olo okwa nwefa omahooli kOkongo ashike natango ina futa nokudja opo okwa kala ta taatawa kopolifi.
Vati eshi a fika mOndangwa natango okwa nwefa omahooli nokufaduka po, okudja opo okwa taatawa kopolifi ya dja mOndangwa.
Toivo okwe liyasha nondjebo noku xulifila motuwa yaye ponhele opo.
Lwopokati opo, omulumenhu ina shivika vati okwa fya eshi e likupula metale lomeva.
Oshiningwanima osha ningwa kOshikango moshitukulwa shaHangwena Olomakaya efimbo lomutenya.
Otaku hokololwa kutya omulumenhu okwe likupula momeva moipafi yovakwashiwana ovo va hangika petale opo tava teke omeva.
Opolifi otai indile moshiwana kwaau a kanifa omupambele waye opo a talele po okila koshipangelo shaNgela nelalakano opo a ka tale ngeenge omulumenhu ou omupambele wavo.