OSHAKATI – Omulumentu gumwe okwa hokolola ta ti oomposi momeho ge kadhi mo we omolwomonakadhona ngoka ta hepekwa komukithi gwokankela moshipangelo shaShakati.
Omulumentu ngoka kee na iiyemo yasha, ota indile ekwatho moshigwana opo a yambidhidhwe nashooka shi li po, a kale ta talele po omwanakadhona kehe siku.
Wilfred Shiyelekeni Kashimilu, ngoka a yambukile kOmaalala moshitopolwa shaShana okwa ti ota sile oshimpwiyu omwanakadhona gwomimvo 14, ngoka a monika omukithi gwokaankela nuumvo momasiku 4 gaJuli.
“Onkalo otayi ende yu uka kuuwinayi, onda hala okanona kandje ka kale po hwepo, opo ka tsikile neyilongo lyako, oshoka oka kala haka pe ndje iizemo iiwanawa nkene ka tamekele osikola,” ta ti ngaaka.
Ta ti, onkalo yi li okanona ke ihayi mu kothitha nando.
Kashimilu okwa ti, okanonakadhona ke sho ka li ke na omimvo heyali, oka li ka fikwa kumukwawo kombunda gwomimvo ndatu, ethimbo ka li haka kala nayina koAngola.
“Sho ka li ka gwanitha omimvo hetatu, ngame nameme okwa li twa yi kefumbiko lyatatekulu koAngola, oshoka aakwanezimo yetu oyendji oye li koAngola,’’ ta popi ngaaka.
Ta gwedha po ta ti, ndyoka olyo ethimbo a li a tseyithilwa kutya omona okwa li a fikwa omumvo gwa yi.
Ta hokolola kutya omona okwa li a zi ko naye, sigo oshilalo sha ti po nawa, nokwa li a tameke osikola.
“Omumvo gwa yi meme okwa li a yi nokanona hoka koAngola nokwa li e ka thigi ko, shoka a popi nayina inandi shi tseya, nokakwa li ye shi lombwela ndje, nonando nda li nda lombwele meme kutya ina thiga ko okanona,” ta popi ngaaka.
Ta ti, nuumvo muMai okwa li a tuminwa efano komalungula lyomona e na oshilalo tashi shololitha kombunda.
Ta popi ta ti, shoka inashi mu kothitha, nokwa li e ke mu tala ko, ee te mu eta moshipangelo shaShakati.
“Okwa tutswa natango, opo ku talike kutya omukithi ogwa yi sigo openi molutu, ihe otwa lombwelwa kutya omayamukulo ngoka otaga vulu okukwata ethimbo ele ga galuke,” ta ti ngaaka.
Shika osho sha etitha anuwa opo a konge ekwatho moshigwana, oshoka ota nyengwa nale okuyambindhindha omona nokulya oshowo oshimaliwa sholefa okuya koshipangelo.
“Otandi indile moshigwana kukehe ngoka ta vulu okuyambidhidhandje noshimaliwa nenge nakehe shoka e na po, omanga iizemo mbyoka tayi ya,’’ ta indile ngaaka.v
kaapanda@nepc.com.na