Ompangulilo yaMagestalata mOkahao oya tindile omulumentu gwomimvo 20 eifutilemo mondjendhililo sho anuwa a dhengagula okanona komimvo omugoyi nodhalate yolusheno e teka fike nomeya gafuluka.
Iihuna mbika yinyanyaleka oya longwa mOsoondaha yomasiku 05 May momukunda Okaale moshitopolwa shaTsandi.
Omukuluntu gwopolisi moshitopolwa shaMusati Commissioner Ismael Basson okwa ti, oshipotha shomulumentu nguka gwedhina Amoni Iindongo osha undulilwa komasiku omugoyi gaJuni nuumvo.
Basson okwa hokolola ta ti okanona hoka ke li mOndondo yotango pOlyasiti Primary School oka yi pegumbo lyopuushiinda anuwa ka ka yaka iikulya, sho ka kwatwa komulumentu gwomuushinda shawo.
Indungo anuwa okwa kutha ongodhi yolusheno, e te ka dhengagula olutu aluhe. Konima okwa tula oshiketitha shomeya peziko e te ga fulukitha. Sho a mona oku fulukitha omeya okwe ga tile kombuna yokanona. Shoka posha eta opo okanona ka mone oshipoka olutu aluhe, na unene kombunda yako hokwa kwa pya noonkondo.
Basson ta yelitha kutya oshipotha shika osha lopotelwa opolisi komulumentu omunamimvo 43.
Uuyelele gumwe gwa gwedha po, omupopepi gumwe anuwa okwa hokololele opolisi kutya okanona hoka oha kala nomukulupe, omukwawo gwahe.
Otaku fekelelwa kutya okanona hoka ka hingwa kondjala ka kayake iikulya oshoka esiloshimpwiyu megumbo kali li nawa.
Opolisi oya ti otayi tsikile okuninga omakonakono moshinigwanima shika.
Kakututu komatanga gwopolisi moshilongo Joseph Shikongo oshiwike sha zi ko sho a talele po oshitopolwa shaShana okwa gandja omalongo oshowo omakumagindho nomalongo koshigwana opo shi hulithe po omahepeko.
Shikongo okwa li a wayimine oshigwana pamwe naakulunutu yopolisi miitopolwa yokonooli ayehe.