ONGWEDIVA – Opolifi moshitukulwa shaShana oya kwata po omunamido 30, omukwashiwana waMalawi, oo vati e na ongeshefa yokomalungula yoipupulu.
Otaku hokololwa omulumenhu ou eshi pondola oku kengelela omukainhu womido 22, omunafikola koshiputudilo shoIUM mOngwediva oshimaliwa shoN$5400.
Omupopiliko wopolifi mOshitukulwa shaShana Chief Inspector Thomas Aiyambo okwa ti omakonakono opolifi okwa hokolola kutya omulumenhu ou oha tula oinima komalungula ta ti ota landifa nelalakano lokutula ovanhu mokatoo.
Vati voo nomukainhu ova shakena kepandja loWhatsapp oko a li ta landifa omutwe wombete. Okudja opo omunafikola ou ova ya mekwatafano lopaumwene nomulandifi – fiyo omukainhu ta tumine omulumenhu oo oshimaliwa shokulanda omutwe wombete momadiku 3 Juni.
Ota ku hokololwa kutya omukainhu ou okwa kala a telela oule womafiku opo omutwe wombete u twalwe keumbo lavo, naashi a ka dimbulula kutya okwa tulwa mokatoo, okwa ya kopolifi.
Omufekelwa kwatwa po nota pangulilwa oshibofa shokukegela ovanhu.
Aiyambo okwa kumaida oshiwana opo shi xulife po okulanda oinima komalungula shaashi osha nyika oshiponga.
Oshiwana osha kumaidwa shi longele kumwe okulopotela opolifi oibofa yoludi eli.
fhamalwa@nepc.com.na