Charles Ndeumane
Opolisi moshitopolwa shaShikoto oya waimine ofamili yokamatyona komimvo 17, Titus Kateta, ngoka a kana mOsoondaha ya si ko.
Titus ngoka e li mondondo ontimugoyi kEkulo Secondary School anuwa okwa lalekwa mOsoondaha opo a shune komuhandjo. Omumati ngika anuwa okwa londo olefa pamwe nomumati gwaandjawo e ta helukile pOmuthiya opo aye kosikola, ashike oku za mpoka ina monika we.
“Aanasikola pamwe naye sho ya pulwa kosikola oya ti oye mu mona a thikama popate a zala iikutu ye yopaumwene, nonande kekumbo okwazi ko a zala omuzalo gwosikola,” Aina Kateta, yina ya Titus ta ti. Aina Kateta ta ti ota fekele kutya Titus okwa londo okambesa etayi kuushimba noshimaliwa shoka e mu pe a ka lande iinima ye yokomuhandjo. Ta ti Titus ina nyenyetelwa nenge a ningwe nayi, ye ke na uupyakadhi wopamadhiladhilo. Ngoka wu na uuyelele kombinga yomumati nguka na dhengele Aina Kateta konomola yongodhi 0812845998.