Aakalimo pamwe nopolisi moshitopolwa shaMusati oya taalela omaupyakadhi giimbuluma, mbyoka tayi ende tayi indjipala, noya pimbila ethimbo ndika lyu uka kehulilo lyomumvo.
Omupopiliko gwopolisi moshitopolwa shaMusati Inspekta Anna Kunga okwa ti iimbuluma oya indjipala, aafuthi otaya longitha ompito kehe okuyuga aakwashigwana iimaliwa yawo, iihauto oshowo okuteya omagumbo.
Natango opolisi oya ndhindhilike omadhipagathano nomakwato koonkondo taga indjipala moshitopolwa shaMusati.
Okwa lopotwa iimbuluma kumwe ayihe ya holoka yi li 584, omadhipagathano ge li 15, omateyo gomagumbo 348 oshowo eyako lyiimuma yi li 221 nuumvo ashike.
Kunga ta ti, ndika olyo ethimbo ookalyamupombo taya longo ya itula mo onkene oshigwana inashi pumbwa okukala sha kotha tashi mbonyoka.
“Otwa kala nokupopya iiningwanima tayi longwa kaafuthi miikundaneki ya yooloka oshowo okukumagidha oshigwana nkene shi na okwiihumbata, ihe natango otatu lopotelwa iiningwanima yoludhi ndoka,” ta popi ngaaka.
Ta gwedha po kutya oshigwana otashi kumagidhwa kaashi nane iimaliwa oyindji pethimbo ndika lya taalelwa, oshowo okulongitha uukalata okuyanda okuhila aafuthi.
“Opolisi moshitopolwa shaMusati oya kala nokukumagidha oshigwana shi hulithe po okunana iimaliwa koomuma. Uuna gumwe a hala okulanda na kambadhale okulongitha uumbomba pamukalo gwoshinanena,” ta kumagidha ngaaka.
Ta ti, okwa li natango a kumagidha oshigwana shi kale tashi ningi omaindilo kopolisi, opo yi kale tayi thindikile oshigwana uuna taya ka nana iimaliwa oyindji, uuna itaya vulu kulongitha uukalata.
Ta popi kutya omagumbo gokuushayi kage li we megameno, aafuthi otaya yaka iimuna kiigunda oshowo koohambo.
Sem Shipanga gwomoshitopolwa shaMusati okwa ti, oyendji oya kutu Aaangola mboka kaye ya shi nawa.
Ngele ye ya momidhingiloko dhawo e taya tseya mo nawa, ohaya ka yaka po iimuna yawo.
“Otatu kanitha iimuna noonkondo, ngele oya pitithwa moAngola ihatu yi mono we, ihe ondi wete kutya uupyakadhi oongamba ndhoka dha weya pokati kaAngola naNamibia,” ta ti ngaaka.
Shipanga ta ti sho ya kala nale omimvo dha piti, oongombe nando odha ningi ethimbo dha kana, ohadhi ka monika oshoka omo dhi li moshilongo, ihe nena ngele odha kana, ihadhi ka monika we, oshoka moshilongo odha hingwa mo.
Sheehama Nelongo gomomukunda Omapopo okwa ti, uupyakadhi wiimuna tayi kana owu li apehe.
Yamwe ohaya ka landitha kaadhipagi yoongombe, haya landitha oonyama omanga yamwe haya pititha okuya moAngola.
“Shika otashi tu teya omitima. Tse katu na mpoka hatu longo ihe otwa ikolelala ashike moongombe,” ta nyenyeta ngaaka.
Ta ti, oya ndhindhilike kutya uupyakadhi mboka ohau etwa kaalithi yiimuna, oshoka oyo haya kala ye li koohambo oshowo haya litha iimuna.
Ta popi ta ti, oya kanitha nale oongombe momumvo ngoka gwa li ko gondjala, ihe natango otaya yugwa iimuna yawo.
Mehuliloshiwike omwa lopotwa omakwatokoonkondo ga ningilwa unene aanona aashona kaakwanezimo.
vkaapada@nepc.com.na